Երևան–Պեկին հարաբերությունների խորացման ճանապարհին որևէ խոչընդոտ չկա. Միրզոյան
Հայաստանը ձգտում է ամրապնդել կապերը Չինաստանի հետ ոչ միայն առևտրի և ենթակառուցվածքների, այլև մշակույթի և մարդկային փոխգործակցության ոլորտներում:
Հայաստանի և Չինաստանի հարաբերությունների խորացման ճանապարհին ոչ միայն չկա որևէ խոչընդոտ կամ արգելք, այլև Երևանը բաց է և պատրաստակամ՝ խորացնելու այդ հարաբերություններն առանց որևէ սահմանափակումների: Պեկին պաշտոնական այցի շրջանակներում South China Morning Post-ի հետ հարցազրույցում ասել է ՀՀ ԱԳ նախարար Արարատ Միրզոյանը։
«Մենք դա քննարկել ենք Չինաստանի մեր գործընկերների հետ։ Մենք ընդգծել ենք մեր հարաբերությունների ռազմավարական բնույթը և տեսնում ենք փոխադարձ շահագրգռվածություն, հետաքրքրություն՝ այս հարաբերությունները պաշտոնապես նոր մակարդակի բարձրացնելու հարցում ևս»,- ասել է Միրզոյանը։
ՀՀ արտաքին քաղաքական գերատեսչության ղեկավարն ընդգծել է, որ Հայաստանը ձգտում է ամրապնդել կապերը Չինաստանի հետ ոչ միայն առևտրի և ենթակառուցվածքների, այլև մշակույթի և մարդկային փոխգործակցության ոլորտներում:
Միրզոյանն անդրադարձել է նաև Չինաստանի դիրքորոշմանը՝ Հայաստանի և հարևանների հարաբերությունների կարգավորման ճանապարհին, ընդգծել, որ Չինաստանն այն երկրների թվում էր, որոնք ողջունեցին Հայաստանի և Ադրբեջանի միջև խաղաղության համաձայնագրի տեքստի համաձայնեցումը: Ինչ վերաբերում է Թուրքիայի հետ հարաբերությունների կարգավորման գործընթացին, Միրզոյանը նշել է, որ նման կարգավորումն առանցքային նշանակություն կունենա Հայաստանի «Խաղաղության խաչմերուկ» ծրագրի համար, որի նպատակն է բարելավել Հայաստանի և իր հարևանների, ինչպես նաև մյուս տարածաշրջանների, այդ թվում՝ Եվրոպայի, Կենտրոնական Ասիայի և Չինաստանի հետ փոխկապակցվածությունը։