Փաշինյան–Ալիև հանդիպումը համարում ենք հաջողված. ՀՀ ԱԳՆ
Հայաստանի Հանրապետությունը ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի` Աբու Դաբիում կայացած հանդիպումը հաջողված է համարում։ Այս հայտարարությունը տարածել է ՀՀ արտգործնախարարությունը։
«Հաստատում ենք, որ այդ հանդիպումը կարող է խաղաղության գործընթացի հետագա իրացման լուրջ հիմք հանդիսանալ»,– ասված է հաղորդագրությունում:
ԱԳՆ–ն միաժամանակ անդրադարձել է ադրբեջանական պետական լրատվամիջոցների հրապարակումներին, ըստ որոնց` «կողմերը լուրջ և բովանդակալից քննարկումներ են ունեցել Հայաստանի և Ադրբեջանի միջև խաղաղության օրակարգի հիմնական ասպեկտների, այդ թվում՝ սահմանազատման, Զանգեզուրի միջանցքի բացման և զարգացման, «Խաղաղության խաչմերուկ» նախագծում, խաղաղության համաձայնագրի նախաստորագրման և այլ հարցերի շուրջ»:
«Հայաստանի վարչապետի և Ադրբեջանի նախագահի հանդիպման արդյունքներով երկու կողմերը հրապարակել են պաշտոնական, եթե նկատել եք՝ նույնական մամուլի հաղորդագրություններ: Դրանից դուրս՝ խաղաղության համաձայնագրի վերաբերյալ պայմանավորվածություն լինելու դեպքում հանրությունն այդ մասին կտեղեկացվեր»,– ընդգծել է ՀՀ ԱԳՆ–ն։
Ինչ վերաբերվում է տարածաշրջանային հաղորդակցությունների ապաշրջափակմանը, ապա նախարարությունը խնդրում է հիմք ընդունել միայն պաշտոնական դիրքորոշումը:
«Դրանից տարբերվող պայմանավորվածություն չկա և չի կարող լինել»,– շեշտել է գերատեսչությունը։
ԱԳՆ–ն հորդորել է զերծ մնալ ադրբեջանական մամուլում կիրառվող՝ ոչ վերաբերելի եզրույթների մեջբերումից:
Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևի` Աբու Դաբիում կայացած հանդիպումը տևել է ավելի քան 5 ժամ և անցկացվել տարբեր ձևաչափերով։ Հանդիպումը սկսվել է ընդլայնված կազմով, ապա առաջնորդները շարունակել են առանձնազրույցը: Կես ժամ տևած ընդմիջումից հետո հանդիպումը կրկին շարունակվել է պատվիրակությունների կազմով, որոշ ժամանակ անց բանակցությունները շարունակվել են առանձնազրույցի ձևաչափով:
Ըստ ՀՀ ԱԳՆ–ի հաղորդագրության` Փաշինյանն ու Ալիևը քննարկել են Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ:
