ՀՀ բրոքերները և դիլերները կկարողանան ԵԱՏՄ բորսաներում արժեթղթեր ձեռք բերել
ՀՀ ռեզիդենտ ներդրումային ծառայություններ մատուցող անձինք (բրոքերները և դիլերները) կկարողանան ձեռք բերել ԵԱՏՄ անդամ պետությունների բորսաներում շրջանառվող արժեթղթեր և ածանցյալ գործիքներ ինչպես ՀՀ ռեզիդենտ, այնպես էլ ԵԱՏՄ անդամ չհանդիսացող պետությունների ռեզիդենտ հաճախորդների համար:
Այդ նպատակով ՀՀ կառավարությունն այսօր հավանություն տվեց Եվրասիական տնտեսական հանձնաժողովի խորհրդի` 2024 թ. ապրիլի 29–ի որոշմամբ հաստատված «ԵԱՏՄ մեկ անդամ պետության բրոքերների և դիլերների՝ մյուս անդամ պետությունների բորսաների (առևտրի կազմակերպիչների) կազմակերպված սակարկություններին մասնակցելու թույլտվության մասին» համաձայնագրին:
«Համաձայնագրի կնքման անհրաժեշտությունը բխում է ԵԱՏՄ շրջանակում միասնական ֆինանսական շուկա ստեղծելու սահմանված նպատակից և հանդիսանում է այդ նպատակին հասնելու միջոցառումներից մեկը»,– ասված է որոշման հիմնավորման մեջ:
Նշվում է, որ համաձայնագրի շնորհիվ կապահովվի ներդրումների ներգրավումը ՀՀ արժեթղթերի շուկա` ՀՀ բորսայում շրջանառվող արժեթղթերին ԵԱՏՄ անդամ պետությունների ներդրումային ծառայություն մատուցող անձանց հասանելիության տրամադրման միջոցով:
