Առևտրաշրջանառություն և ԱԷԿ․ ի՞նչ են քննարկել Պուտինը և Փաշինյանը Կրեմլում
Ռուսաստանի և Հայաստանի միջև հարաբերությունները կայուն զարգանում են, երկրների միջև առևտրաշրջանառությունը 2024 թվականին հասել է ռեկորդային մակարդակի՝ ավելի քան 11 միլիարդ դոլարի։ Այս մասին հայտարարել է Ռուսաստանի նախագահ Վլադիմիր Պուտինը Մոսկվայում ՀՀ վարչապետ Նիկոլ Փաշինյանի հետ հանդիպման ժամանակ։
«Ընդհանուր առմամբ, հարաբերությունները կայուն զարգանում են։ Ռուսաստանի հետ Հայաստանի առևտրաշրջանառությունը, ըստ մեր վիճակագրության, կազմում է 11,7 միլիարդ դոլար, որը Հայաստանի հանրապետության արտաքին առևտրաշրջանառության 34 տոկոսն է կազմում։ Սա ռեկորդային ցուցանիշ է 2024 թվականի համար», - ասել է Պուտինը։
Առևտրի մասին խոսելով՝ ՀՀ վարչապետը նշել է, որ այս տարի աննշան անկում է գրանցվել՝ պայմանավորված համաշխարհային գործընթացներով։ Կարևոր է աշխատել, որ փոխադարձ առևտրի տեմպերը հասնեն 2023 և 2024 թվականների ցուցանիշներին։
ՌԴ նախագահի խոսքով` երկկողմ հարաբերությունները զարգանում են նաև մյուս ոլորտներում, մասնավորապես՝ էներգետիկայի ոլորտում։
ՀՀ վարչապետը նշել է, որ Երևանը սերտորեն համագործակցում է Մոսկվայի հետ և աշխատում է Հայկական ատոմակայանի կյանքը մինչև 2036 թվականը երկարաձգելու ուղղությամբ։
Այսօր մենք շատ բան սովորեցինք միջուկային տեխնոլոգիաների մասին, շնորհակալություն ձեր փորձը ներկայացնելու համար։ Ատոմային էներգիան նույնպես շատ կարևոր է Հայաստանի համար։
«Հայաստանը երկար տարիներ ունի ատոմակայան, որը, ինչպես դուք ինքներդ նշեցիք ֆորումում, ապահովում է երկրի էլեկտրաէներգիայի 30%-ը։ Սա նշանակալի թիվ է՝ 30%. ամբողջ էլեկտրաէներգիայի մեկ երրորդը արտադրվում է ատոմակայանի կողմից», - ասել է ՌԴ նախագահը։
Պուտինը հիշեցրել է, որ «Ռոսատոմը» ներկայում աշխատում է ատոմակայանի կյանքի ժամկետը երկարաձգելու ուղղությամբ։
Սեպտեմբերի 25-28-ը Մոսկվայում մեկնարկել է «Համաշխարհային ատոմային շաբաթ» միջազգային համաժողովն։ Այն նվիրված է ատոմային և դրան հարակից ճյուղերին և անցկացվում է ի պատիվ ռուսական ատոմային ոլորտի 80-ամյակի:
Համաժողովին մասնակցում են ատոմային ծրագրեր զարգացնող երկրների, պետական կառույցների, խոշոր ընկերությունների, հասարակական կազմակերպությունների ներկայացուցիչներ, պրոֆեսիոնալ ատոմագետներ, գիտնականներ և գործարարներ:
