«Զանգեզուրի միջանցքը» Հորադիզ-Զանգելան ճանապարհն է, այն Հայաստանի մասին չէ. Փաշինյան
«Զանգեզուրի միջանցքը» Հորադիզ–Զանգելան ճանապարհն է, որը կարող է ձգվել մինչև Հայաստանի հետ սահմանային կետ՝ չհասած Հայաստանի սահման, այն Հայաստանի Հանրապետության մասին չէ:
ԱԺ-կառավարություն հարցուպատասխանին այս մասին շեշտեց Հայաստանի վարչապետ Նիկոլ Փաշինյանը:
«Իմ ընկալումն այն է, որ երբ Ադրբեջանն ասում է «Զանգեզուրի միջանցք», նկատի ունի Հորադիզ-Զանգելան ճանապարհը: Ուզում են ասել «Զանգեզուրի միջանցք», թող ասեն «Զանգեզուրի միջանցք»: Ես ասում եմ՝ Հայաստանի Հանրապետությունում չկա այդպիսի բան: Եվ կարող եմ ապացուցել ոչ միայն իմ, այլ նաև Ադրբեջանի նախագահի ստորագրությամբ: Հորադիզ-Զանգելանի միջանցք. կարող են ասել՝ դա միջանցք է, որը տանում է դեպի Զանգեզուր: Ասում են, թող ասեն: Բայց դա Հայաստանի մասին չէ»,- ասաց Փաշինյանը:
Ըստ նրա՝ հայկական կողմին չպետք է հուզի, թե Ադրբեջանն ինչ անուն է դնում:
«Կարող է որոշեն անունը դնել «Ալբերտ Էյնշտեյն»: Թող դնեն: Դա մեր ինքնիշխան տարածքի հետ ոչ մի կապ չունի: Ես թղթեր ունեմ ստորագրած, դրանք հրապարակային են: Մեր երկրի տարածքում կա «Թրամփի ուղի» և «Խաղաղության խաչմերուկ»»,- ասաց վարչապետը:
Խոսելով «Խաղաղության խաչմերուկ»-ի մասին՝ նա ընդգծեց՝ Հայաստանն իր տարածքում նախագիծ ունենալու համար որևէ մեկի հետ չպետք է այն համաձայնեցնի: «Մենք մեր երկրի տարածքում կարիք չունենք որևէ մեկի հետ համաձայնեցնել, թե անունն ինչ դնենք: Իսկ համաձայնեցված անունը TRIPP ուղին է:
«Զանգեզուրի միջանցքը» Հորադիզ-Զանգելան ճանապարհն է, որը կարող է ձգվել մինչև Հայաստանի հետ սահմանային կետ՝ չհասած Հայաստանի սահման»,- ասաց վարչապետը: Նա շեշտեց՝ «Զանգեզուրի միջանցքը» Հայաստանի Հանրապետության մասին չէ, Ադրբեջանն իր տարածքում ինչ անուն ուզում է, կարող է դնել:
