ԵՄ-ն 25 %-ով կավելացնի Հայաստանին տրամադրվող ֆինանսական աջակցությունը․ Սվիտալսկի
ԵՄ-ն նախատեսում է 25 տոկոսով ավելացնել Հայաստանին տրամադրվող ֆինանսական աջակցությունը։
Այս մասին այսօր՝ նոյեմբերի 27-ին, լրագրողների հետ հանդիպման ժամանակ նշեց Հայաստանում ԵՄ պատվիրակության ղեկավար Պյոտր Սվիտալսկին՝ ավելավնելով նաեւ, որ հասարակ քաղաքացու համար Համապարփակ եւ ընդլայնված գործընկերության համաձայնագիրը գուցե ոչ վաղը, բայց մոտ ապագայում զգալի կլինի։
Հարցադրմանը, թե ԵՄ-ի շահը ո՞րն է, որ Հայաստանի հետ նման համաձայնագիր է կնքում, և արդյո՞ք Հայաստանը կարող է կամուրջ դառնալ ԵՄ-ի և ԵՏՄ-ի միջև, դեսպանն այսպես պատասխանեց. «Մենք ոչ մի գաղտնի բան չունենք, մեզ համար այս համաձայնագիրը մեր ռազմավարության մի մասն է՝ կառուցելու կայուն հարևանություն, տրամադրել մեր եվրոպական գործընկերներին զարգացման հնարավորություններ՝ լավ եղանակով։ Այնպես որ, այս համաձայնագիրը լայն ռազմավարության մի մասն է կազմում, սա անվտանգ և բարեկամական միջավայրի կառուցման մասին է։ Սա առաջին համաձայնագիրն է մի երկրի հետ, որն այլ միության մաս է կազմում։ Իհարկե, ԵՏՄ անդամ երկրներից Ղազախստանի հետ համաձայնագիր ունենք, բայց ՀՀ-ի հետ կնքված համաձայնագիրը շատ ավելի հավակնոտ է, առարկայական, դրական։ ԵՄ-ն չի ցանկանում ինչ-որ բաժանարար գծեր գծել Եվրոպայում, այդ պատճառով, այո, մենք ուզում ենք կամուրջներ կառուցել մեր բոլոր գործընկերների հետ։ Հայաստանում կամուրջի սկզբունքն իսկապես տրամաբանական է։ Սա փոխադարձ շահ է, նման հավակնոտ համաձայնագիր ունենալը երկու կողմի քաղաքական կամքի արտացոլումն է»։
1in.am
