Ռոհանի. Արևմտյան ժողովրդավարությունը թույլ է ու խարխլված
ԻԻՀ նախագահը ԱՄՆ իրադարձություններն ու ԱՄՆ Կոնգրեսի վրա հարձակումը որակել է որպես արևմտյան ժողովրդավարության թուլության և խարխլվելու նշան:
ԻԻՀ նախագահ Հասան Ռոհանին հինգշաբթի օրն անդրադառնալով չորեքշաբթի գիշեր Միացյալ Նահանգներում տեղի ունեցած իրադարձություններին և Վաշինգտոնում Կոնգրեսի շենքի վրա հարձակմանն ասել է.«Այս զարգացումները ցույց տվեցին, որ չնայած արևմտյան երկրներում գիտության և տեխնոլոգիայի առաջադիմությանը, պոպուլիզմը դեռ գոյություն ունի, և որ մի պոպուլիստ մարդ խայտառակեց իր երկրի հեղինակությունը»:
ԻԻՀ նախագահը հավելել է. «Դոնալդ Թրամփը, ստանձնելով ԱՄՆ-ում իշխանությունը, վնասեց երկրի հարաբերությունները ամբողջ աշխարհի հետ և մեծ հարվածներ հասցրեց իր երկրին ու Արևմտյան Ասիայի տարածաշրջանին, Պաղեստինին, Սիրիային, Եմենին և աշխարհի բոլոր մասերին»:
Ռոհանին հույս է հայտնել, որ ԱՄՆ Կոնգրեսի իրադարձությունները դաս կլինեն ամբողջ աշխարհի և Սպիտակ տան հաջորդ ղեկավարների համար, ովքեր իշխանությունը կստանձնեն երկու շաբաթից:
