Զարիֆ. Իրանն առաջիկայում ՀԳՀԾ-ի շրջանակներում կձեռնարկի իր վնասները հատուցող նոր քայլեր
ԻԻՀ ԱԳ նախարարը հայտարարել է, որ ի պատասխան ԱՄՆ-ի և Եվրոպայի կողմից ՀԳՀԾ-ի նկատմամբ անհավատարմությանն, Իրանն առաջիկայում ՀԳՀԾ-ի շրջանակներում կձեռնարկի իր վնասները հատուցող նոր քայլեր:
Իսլամական հեղափոխության հաղթանակի 42-րդ տարեդարձի կապակցությամբ հրապարակված տեսաուղերձում, Իրանի արտաքին գործերի նախարար Մոհամմադ Ջավադ Զարիֆը, դիմելով ԱՄՆ-ի նոր վարչակազմին ասել է, որ Վաշինգտոնում նոր կառավարության իշխանության գալուց հետո, հնարավորություն է ստեղծել նոր մոտեցում կիրառել ՀԳՀԾ-ի վերաբերյալ,ս ակայն պատուհանը, որ հիմա բաց է, շուտով կփակվի:
Զարիֆը հավելել է. «Ի պատասխան ԱՄՆ-ի և Եվրոպայի կողմից ՀԳՀԾ-ով ստանձնած պարտավորությունների չկատարմանը, Իրանի կառավարությունը շուտով ստիպված կլինի նոր փոխհատուցող գործողություններ ձեռնարկել»:
Իրանի արտգործնախարարը նշել է, որ Թեհրանը բազմիցս ապացուցել է իր հարևանների հետ ընդհանուր նպատակներին հասնելու ուղղությամբ փոխգործակցության և համագործակցելու պատրաստակամությունը: Նրա խոսքերով.«Իրանի նպատակն է կառուցել կայուն, խաղաղ և բարեկեցիկ տարածաշրջան և Թեհրանն այդ ուղղությամբ քայլեր է ձեռնարկել»:
Իրանի դիվանագիտական գերատեսչության ղեկավարը հույս է հայտնել, որ Իրանի հարևանները նույնպես իմացել են, որ չեն կարող սպասել, որ օտարերկրացիներն ապահովեն իրենց անվտանգությունը, քանի որ աշխարհագրական ճակատագիրը հարևանների միասնության մեջ է:
