TikTok-ը զբաղվելու է չինական շուկայում իրանական արտադրանքը ներկայացնելով
TikTok սոցիալական ցանցերի չինական հարթակի ներկայացուցիչները պետք է ժամանեն Իրան՝ իրանական բիզնես լոբիստական խմբի հետ բանակցելու համար, տեղեկացնում է Mehr-ը։
Թեհրանի առևտրային պալատի բարձրաստիճան անդամ Հեսամ Էլդին Աբբաս Հալլաջը հայտնել է, որ չինական պատվիրակությունը կիրակի Իրան է ժամանելու Իրանի Առևտրի և արդյունաբերության նախարարության (MIMT) պաշտոնական հրավերով և Թեհրանի ու Պեկինի միջև առևտրատնտեսական համագործակցության աշխուժացման ջանքերի շրջանակում։
Բիզնեսմենը նշել է, որ Douyin-ի և MIMT-ի միջև գործընկերային նախագծի հիմնական նպատակը չինական շուկայում իրանական արտահանողների ներկայությունը մեծացնելու հնարավորության քննարկումն է։
«Օգտագործելով արհեստական ինտելեկտի տվյալները և որոշելով չինացի գնորդների ճաշակը՝ այս առևտրական ընկերությունը տեսակոնտենտ է ստեղծելու, որպեսզի օգնի իրանական ընկերություններին շուկա հանել և ապրանք վաճառել Չինաստանում հայտնի հարթակների միջոցով, ինչպիսին Douyin-ն է»,- մեջբերում է անում ISNA լրատվական գործակալությունը։
TikTok-ի ներկայացուցիչների և իրանական բիզնեսի հանդիպումը կայանալու է Iran ELECOMP 2023 խոշոր տեխնոլոգիական միջոցառման շրջանակում, որը Թեհրանում մեկնարկել է այս շաբաթ՝ կորոնավիրուսով պայմանավորված քառամյա ընդմիջումից հետո։
