Իրանն ու ՌԴ-ն քննարկել են Եվրասիական տարածաշրջանում գազային հանգույց ստեղծելու հնարավորությունը

Ալժիրում Գազ արտահանող երկրների ֆորումի (GECF) գագաթնաժողովի շրջանակներում Իրանի նավթի նախարար Ջավադ Օջին հանդիպել և բանակցություններ է վարել ՌԴ էներգետիկայի նախարար Նիկոլայ Շուլգինովի հետ, հայտնում է Mehr-ը։

Հանդիպման ընթացքում կողմերը քննարկել են ՇՀԿ-ի շրջանակներում Եվրասիական տարածաշրջանում գազային հանգույցի ստեղծման, նավթի և գազի հանքավայրերի զարգացման, ինչպես նաև առկա պայմանագրերի իրականացման հարցերը։

Բարենպաստ բանակցություններ են վարվել նաև երկու երկրների կողմից նավթի և գազի վերամշակման  նոր պայմանագրերի ստորագրման վերաբերյալ։

Օջին և Շուլգինովը քննարկել են նաև Իրանի և Ռուսաստանի միջև էլեկտրացանցերի միացման վերաբերյալ ձեռք բերված պայմանավորվածությունների իրականացման գործընթացը։

GECF գագաթնաժողովը ամենամյա միջոցառում է, որին մասնակցում են մասնակից երկրների պետությունների և կառավարությունների ղեկավարները: Այն հարթակ է տրամադրում առաջնորդներին՝ քննարկելու գազի համաշխարհային արդյունաբերության հետ կապված հարցերը, ներառյալ շուկայի միտումները, մարտահրավերները և հնարավորությունները: Իրանը մտադիր է  GECF գագաթնաժողով անցկացնել 2027 թվականին։