Արաղչի. Իրանը հավատարիմ է մնում այն ինչին,որ ստորագրում է
Pars Today - Իրանի ԱԳ նախարարն ընդգծելով Իրանի տնտեսական շահերի երաշխավորումը ցանկացած համաձայնության ձեռքբերման արդյունքում, ասել է, որ Իրանը վստահելի է և միշտ հավատարիմ է մնում այն ինչին,որ ստորագրում է։
Իրանի արտաքին գործերի նախարար Սեյյեդ Աբբաս Արաղչին իր ելույթում,որը նախատեսված էր ներկայացնել Քարնեգիի Միջուկային քաղաքականության միջազգային համաժողովում, ընդգծել է Իրանի հավատարմությունը միջազգային պարտավորություններին։ Նշելով, որ Իրանը միշտ հավատարիմ է մնում այն ինչին ,որ ստորագրում է, նախարար Արաղչին ասել է, որ Իսլամական Հանրապետությունը ձգտում է ցանկացած համաձայնագրում երաշխավորված լինեն իր տնտեսական շահերը։
Այս հայտարարություններն արվել են այն դեպքում, երբ Իրանը, որպես NPT-ի (Միջուկային զենքի չտարածման պայմանագրի) հիմնադիր անդամներից մեկը, միշտ հավատարիմ է եղել խաղաղ միջուկային տեխնոլոգիաներին համընդհանուր հասանելիության և միջուկային զենքի մերժման սկզբունքներին:
Արաղչին նաև նշել է, որ Իրանը միակ երկիրն է, որը բարոյական և կրոնական նկատառումներից ելնելով պաշտոնապես հայտարարել է,որ դեմ է միջուկային զենքին , և այս դիրքորոշումը հաստատվել է Իսլամական հեղափոխության առաջնորդի ֆեթվայով, որում ասվում է, որ նման զենքն արգելված է։
Արաղչին այնուհետև անդրադառնալով արևմտյան երկրների երկակի ստանդարտներին, ասել է, որ Իսրայելի միջուկային զինանոցի անտեսումը և այս ռեժիմի կողմից NPT-ին չմիանալու կամ Ատոմային էներգիայի միջազգային գործակալության վերահսկողությունը չընդունելու փաստն անտեսելը վնաս է հասցրել միջուկային զենքի չտարածման համաշխարհային ռեժիմին: Նա հավելել է, որ Իրանի խաղաղ միջուկային ծրագիրը սխալ պատկերացումների և քաղաքական դրդապատճառների հետևանքով թյուրիմացությունների ու աղավաղումների է ենթարկվել: Այս կեղծ պատմությունները հանգեցրել են սխալ քաղաքականության ձևավորման և իմաստալից դիվանագիտության հնարավորությունների կորստի։
Իրանի ԱԳ նախարարն անդրադարձել է նաև Համատեղ գործողությունների համապարփակ ծրագրին(ՀԳՀԾ) և ասել, որ Իրանը հավատարիմ է մնացել իր պարտավորություններին նույնիսկ այն բանից հետո, երբ ԱՄՆ-ն դուրս է եկել համաձայնագրից։ Դա վերջերս հաստատել է ԱՄՆ Ազգային հետախուզության տնօրենը։ Այնուամենայնիվ, Արաղչին հայտարարեց, որ ՀԳՀԾ-ն այլևս չի բավարարում Իրանի կարիքները, և որ Իրանում շատերը ցանկանում են նոր համաձայնագիր, որը կերաշխավորի երկրի շահերը և միաժամանակ կփարատի բոլոր կողմերի մտահոգությունները:
Արաղչին նաև նշել է, որ Իրանը երբեք չի խոչընդոտել ԱՄՆ-ի հետ տնտեսական և գիտական համագործակցությունը, և որ իրանական շուկան կարող է վերակենդանացնել ԱՄՆ-ի անկում ապրող միջուկային արդյունաբերությունը։ Նա ընդգծել է, որ Իրանի դեմ սպառնալիքներ և ճնշում գործադրելը անարդյունավետ է և փակում է համաձայնության գալու ճանապարհը։ Փոխադարձ հարգանքի և հավասար դիրքի վրա հիմնված կառուցողական փոխգործակցությունը վստահության ձևավորման և երկխոսությունն առաջ մղելու միակ արդյունավետ լուծումն է: Նա վերջում ասաց,որ միջուկային զենքի չտարածման համաշխարհային ռեժիմը պահպանելու համար բոլոր կողմերը, հատկապես նրանք, ովքեր ունեն այդ զենքերը, պետք է կատարեն իրենց պարտավորությունները: