ԻԻՀ -ում ՀՀ դեսպանն ընդունել է իրանահայ համայնքի մի խումբ ներկայացուցիչների

Իրանում Հայաստանի դեսպան Գրիգոր Հակոբյանն ընդունել է ՀՅԴ Բյուրոյի անդամ Սևան Դանիելյանին, «Ալիք» հաստատության ներկայացուցիչ Գարո Հովհաննիսյանին, Թեհրանի հայոց թեմի թեմական խորհրդի ատենապետ Վարուժ Հովհաննիսյանին և Թեհրանի հայոց թեմի պատգամավորական ժողովի ատենապետ Սուրիկ Աբնուսյանին:

Այս մասին հաղորդագրություն է տարածել   ԻԻՀ-ում  ՀՀ դեսպանությունը։

Զրուցակիցները քննարկել են դեսպանության և համայնքի ազգային իշխանության միջև փոխգործակցության վերաբերյալ հարցեր։ 

Պատվիրակությունը պատրաստակամություն է հայտնել իրանահայության հնարավորությունների և համայնքային իրավասությունների շրջանակում աջակցելու Հայաստան-Իրան բարեկամական հարաբերությունների ամրապնդմանն ու խորացմանը՝ այդ թվում մշակութային և հասարակական ոլորտներում հնարավոր համագործակցությանը։

Հանդիպման ընթացքում կողմերը ցավով անդրադարձել են  Հայոց Ցեղասպանության 110-րդ տարելիցի առիթով Թեհրանի Սուրբ Սարգիս եկեղեցում կազմակերպված ոգեկոչման արարողության ընթացքում տեղի ունեցած անթույլատրելի միջադեպին և անընդունելի համարել այն: 

ՀՀ դեսպանը և համայնքի ազգային իշխանության ներկայացուցիչներն ընդգծել են առավելագույն ջանքեր գործադրելու անհրաժեշտությունը՝ բացառելու նմանօրինակ ցանկացած փորձ, որոնք կարող են բացասաբար ազդել ՀՀ դեսպանության ու համայնքի միջև հարաբերություններին: