Արբաին. Աշխարհի ամենամեծ խաղաղ հավաքը դեպի Քարբալա տանող ճանապարհին

Ամեն տարի Սաֆար ամսի 20-ին, աշխարհի տարբեր ծայրերից միլիոնավոր մարդիկ քայլում են դեպի Քարբալա՝ վառ պահելու իմամ Հոսեյնի հիշատակն ու ուղերձը։ Ուղերձ, որը գերազանցում է կրոնն ու սահմանները՝ շեշտը դնելով ճնշմանը դիմակայելու վրա։

Աշխարհում, որտեղ լուրերը հաճախ պատմում են պատերազմի և լարվածության մասին, իմամ Հոսեյնի Արբաինի երթերն ամեն տարի աշխարհի տարբեր ծայրերից միլիոնավոր մարդկանց են հավաքում, առանց պաշտոնական հրավերների կամ քաղաքական նպատակների, դեպի ընդհանուր նպատակակետ՝ Քարբալա: Այս հավաքը, որը անվանվել է աշխարհի ամենամեծ խաղաղ երթը, կարեկցանքի, զոհաբերության և ճնշմանը դիմադրության հազվագյուտ դրսևորում է:

Արբաինը Մուհամմադ մարգարեի թոռան՝ իմամ Հոսեյնի նահատակության 40-օրյակի արարողությունն է։ Իմամ Հոսեյնը նահատակվեց Աշուրայի միջադեպի ժամանակ: Այս օրը  շիաների և աշխարհի բազմաթիվ ազատ մարդկանց համար արդարության իդեալներին հավատարմության խորհրդանիշ է: 680 թվականին Քարբալայում տեղի ունեցած միջադեպը, երբ իմամ Հուսեյնը հրաժարվեց հավատարմության երդում տալ կոռումպացված Ումայադ կառավարությանը և նահատակվեց իր 72 ուղեկիցների հետ միասին, դարձավ դիմադրության պատմության մեջ անմոռանալի պահ։

Արբաինի երթին ամեն տարի մասնակցում է տարբեր երկրներից ավելի քան 20 միլիոն մարդ: Նաջաֆից մինչև Քարբալա 80 կիլոմետրանոց երթուղին ուխտավորներն անցնում են երեք օրում։   Ճանապարհին հազարավոր մարդիկ դիմավորում են ուխտավորներին անվճար ծառայություններով, այդ թվում՝ սննդով, ջրով, կացարանով և բժշկական ծառայություններով։ Հյուրընկալության և ծառայության նման դրսևորումը գերազանցում է սահմաններն ու կրոնները:

Երթին ոչ մուսուլմանների, լրագրողների և հետազոտողների ներկայությունը այն վերածում է միջմշակութային երկխոսության և խաղաղ համակեցության ցուցադրման հնարավորության։ Միջազգային լրատվամիջոցները, այդ թվում՝ BBC-ն և CNN-ը, Արբաինը  բնութագրել են որպես «աշխարհի ամենամեծ խաղաղ երթը»։

Արբաինի ուղերձը պարզ և հստակ է. մարդկությունը, սահմաններից և համոզմունքներից այն կողմ, դեմ է ճնշմանը։