ՀՀ ՊՆ պատվիրակությունն այցելել է Հնդկաստանի ռազմաօդային ուժերի ավիաբազա
Հայաստանի զինված ուժերի հինգ հոգանոց պատվիրակությունը՝ գլխավոր շտաբի գլխավոր օպերատիվ վարչության պետի տեղակալ, գեներալ-մայոր Ալեքսանդր Ցականյանի գլխավորությամբ, այցելել է Հնդկաստանի ռազմաօդային ուժերի արևմտյան ավիացիոն հրամանատարության ենթակայության տակ գտնվող ավիաբազա։
Այս մասին հաղորդում է Հնդկաստանի ռազմաօդային ուժերի մամուլի ծառայությունը։
ՀՀ պատվիրակության համար կազմակերպվել է շրջայց ավիատեխնիկայի շահագործման և տեխնիկական սպասարկման համար նախատեսված օբյեկտներում:
Նշվում է, որ այցը նպաստել է ռազմական համագործակցության սերտացմանը, փոխըմբռնմանը, փորձի փոխանակմանը և օպերատիվ համատեղելիությանը, ինչպես նաև ամրապնդել է Հնդկաստանի և Հայաստանի միջև պաշտպանական կապերը:
Նշենք, որ օգոստոսի 31-ին ՀՀ վարչապետ Նիկոլ Փաշինյանի հետ հանդիպումից հետո Հնդկաստանի վարչապետ Նարենդրա Մոդին X սոցցանցում գրել էր, որ Դելին շահագրգռված է Հայաստանի հետ պաշտպանության, տեղեկատվական տեխնոլոգիաների և տիեզերական ոլորտներում համագործակցության հետագա զարգացմամբ:
