Ալիև․ Հայաստանի նախկին ղեկավարները պետք է պատասխան տան իրենց գործունեության համար
Ադրբեջանի նախագահը, Հայաստանի նախկին ղեկավարներին ռազմական հանցագործություններ կատարելու մեջ մեղադրելով, ընդգծել է Բաքվի ռազմական կարողությունների շարունակական ամրապնդման և գաղափարական համախմբվածության կարևորությունը։
Pars Today-ի հաղորդմամբ՝ ISNA-ին հղում անելով, Իլհամ Ալիևը «Նոր Ադրբեջան» իշխող կուսակցության 8-րդ համագումարում Հայաստանի բոլոր նախկին ղեկավարներին անվանել է «ռազմական հանցագործներ» և հայտարարել, որ նրանք պետք է ստանան «արժանի պատիժ»։
Ալիևը նաև Հայաստանի ներկայիս պաշտոնյաներին մեղադրել է Ադրբեջանի նկատմամբ, իր բնորոշմամբ, «տարածքային պահանջներ» ներկայացնելու մեջ և ասել, որ Ադրբեջանի ժողովուրդը չպետք է մոռանա այդ քայլերը։
Ադրբեջանի նախագահը 2020 թվականի ռազմական գործողությունները և 2023 թվականի սեպտեմբերին Ղարաբաղում իրականացված ռազմական գործողությունը ներկայացրել է որպես այն գործընթացի մաս, որն ուղղված էր իր բնորոշմամբ «Ադրբեջանի տարածքային ամբողջականության լիակատար վերականգնմանը»։ 2023 թվականի ռազմական գործողությունը հանգեցրեց Ղարաբաղի էթնիկ զտմանը։
Ալիևը ռազմական կարողությունների շարունակական ամրապնդումը համարել է Բաքվի հիմնական առաջնահերթություններից մեկը և ընդգծել, որ դա անհրաժեշտ է յուրաքանչյուր երկրի համար։ Նա նաև կոչ է արել ավելի մեծ վերահսկողություն սահմանել գաղափարական ոլորտի նկատմամբ և պայքարել իր բնորոշմամբ «արտաքին ազդեցությունների» դեմ։
Ադրբեջանի նախագահն իր ելույթի մեկ այլ հատվածում հայտարարել է, որ Բաքուն արտաքին աջակցության կարիք չունի և ընդգծել, որ երկիրը հարված ստանալու դեպքում պատասխան կտա։ Նա նաև քննադատել է Լեռնային Ղարաբաղի հակամարտության տարիներին ԵԱՀԿ Մինսկի խմբի գործունեությունը։