Իրանի խորհրդարանի ազգային անվտանգության հանձնաժողովն Արաղչիի հետ քննարկել է Կովկասի զարգացումները
Իսլամական խորհրդարանի ազգային անվտանգության և արտաքին քաղաքականության հանձնաժողովի խոսնակը հայտարարել է ԱԳ նախարար Աբբաս Արաղչիի և նախարարության մի շարք այլ պաշտոնյաների ներկայությամբ հանձնաժողովի նիստի անցկացման մասին։
Էբրահիմ Ռեզային ասել է. «Հանդիպման առաջին մասում ԱԳՆ Եվրասիայի գլխավոր տնօրենը ներկայացրել է զեկույց Կովկասի տարածաշրջանում վերջին զարգացումների, մասնավորապես՝ Հայաստանի և Ադրբեջանի միջև ճանապարհի վերաբերյալ և անդրադարձել այդ հարցերի կապակցությամբ Իրանի դիրքորոշումներին ու մտահոգություններին»։
Iran Online կայքի փոխանցմամբ՝ նա ասել է. «Երկրորդ բաժնում ԱԳ նախարար Արաղչին ներկայացրել է երկու զեկույց՝ Կովկասի զարգացումներին և Հայաստանի ու Ադրբեջանի Հանրապետության միջև միջանցքի վերաբերյալ»։
Ռեզային հավելել է. «Նախարար Արաղչին ասել է, որ Իրանը դեմ է Կովկասի երկրների աշխարհաքաղաքական ցանկացած փոփոխության և սահմանների փոփոխության կամ ինքնիշխանության խախտման։ Իրանի Իսլամական Հանրապետության սկզբունքային դիրքորոշումը նշված է Ադրբեջանի և Հայաստանի համատեղ հայտարարության մեջ, որում հայտարարության մեջ ընդգծվում է սահմանների անձեռնմխելիությունը, տարածաշրջանի երկրների ինքնիշխանության և տարածքային ամբողջականության պահպանումը, այս երթուղու նկատմամբ Հայաստանի իրավասությունը և փոխադարձությունը»։
Նրա խոսքով․ «Ընդգծվել է, որ Հայաստանի և Ադրբեջանի միջև երթուղին կլինի Հայաստանի ինքնիշխանության և իրավասության ներքո։ Իրանի ԱԳ նախարարի խոսքով՝ Հայաստանը ընդգծել է, որ թույլ չի տա ամերիկյան անվտանգության ուժերի ներկայությունը, և հաջորդ կետն այն է, որ մշակվում է Հայաստանի հետ ռազմավարական գործընկերության համաձայնագիր»։