Մահացել է իրանահայ ազգային‑հասարակական հավատավոր գործիչ Վարդան Վարդանյանը
Մահացել է իրանահայ ազգային‑հասարակական հավատավոր գործիչ Վարդան Վարդանյանը։
1984 թվականից շուրջ 16 տարի Թեհրանի եւ հյուսիսային Իրանահայությունն իր մանդատը վստահել էր ճրտ. Վարդան Վարդանյանին՝ Իրանի Իսլամական Հանրապետության Խորհրդարանում։ Նա որպես պատգամավոր և տարբեր հանձնաժողովների անդամ մի քանի գումարումների ընթացքում ընդգրկված է եղել Արդյունաբերության հանձնաժողովում և ընտրվել այդ հանձնաժողովի ղեկավար կազմի անդամ։
Վարդան Վարդանյանի գործունեությունն ու կատարած աշխատանքները լայնորէն հայտնի են իրանահայ համայնքին, հատկապես Իրան-Իրաք պատերազմի տարիներին եւ պատերազմին հաջորդած շրջանում։ Նա նշանակալի ներդրում է ունեցել արդյունաբերության ոլորտում աշխատող գործարարների գործունեության կազմակերպման եւ բարելավման գործում։ Վարդան Վարդանյանի գործունեությունը չի սահմանափակվել միայն արդյունաբերության ոլորտով։
Նա երկար տարիներ ստանձնել է պարսկերենով հրատարակվող «Պայման» պարբերականի հրատարակման պատասխանատվությունը՝ որպես արտոնատեր։
2011 թվականին Վարդան Վարդանյանին է շնորհվել Մովսես Խորենացու շքանշանը: Իրանի ռադիո-հեռուստատեսության արտասահմանյան թողարկումների «Սահաբ» ցանցի հայկական ալիքը, իր խորին ցավակցությունն է հայտնում Վարդան Վարդանյանի ընտանիքին, հարազատներին եւ ողջ իրանահայ համայնքին՝ կիսելով անդառնալի կորստի վիշտը։