Իրանի խորհրդարանի ազգային անվտանգության հանձնաժողովի նախագահ. ԱՄՆ նախագահը չունի այլընտրանք, քան ճառախոսությունը
Իրանի խորհրդարանի ազգային անվտանգության հանձնաժողովի նախագահը, անդրադառնալով 12-օրյա պատերազմում և պարտադրված երրորդ պատերազմում ԱՄՆ-ի պարտություններին, ասել է. «ԱՄՆ նախագահը չունի այլընտրանք, քան ճառախոսությունը»։
Ինչպես հաղորդում է Pars Today-ը՝ հղում կատարելով Mehr գործակալությանը, Ազիզին հինգշաբթի երեկոյան Թեհրանում կայացած՝ Իրանի ԶՈւ Գլխավոր շտաբի նախկին պետ, նահատակ գեներալ-լեյտենանտ Մոհամմադ Բաղերիի, ինչպես նաև նրա կնոջ և դստեր հիշատակին նվիրված միջոցառման շրջանակում հայտարարել է, որ ԱՄՆ նախագահը պատերազմի սկզբից ի վեր հնչեցնում է միանման սպառնալիքներ։
Նրա խոսքով՝ Իրանի Իսլամական Հանրապետությունը ցանկացած թշնամական գործողության կպատասխանի վճռական, կոշտ և ցավոտ հարվածներով, որոնք կստիպեն հակառակորդին զղջալ իր քայլերի համար։
Ազիզին ընդգծել է, որ Իրանի զինված ուժերը լիովին պատրաստ են պաշտպանել երկրի բոլոր սահմաններն ու տարածքները, այդ թվում՝ Խարգ կղզին, որի մասին, ըստ նրա, հիշատակել էր ԱՄՆ նախագահը։
Հանձնաժողովի նախագահը նշել է, որ ԱՄՆ-ն որևէ ձեռքբերում չի ունեցել ոչ 12-օրյա պատերազմի, ոչ էլ հետագա ռազմական գործողությունների ընթացքում։ Նրա գնահատմամբ՝ ԱՄՆ նախագահ Դոնալդ Թրամփը չի կարողացել իրականացնել իր հայտարարած նպատակները՝ Իրանի մասնատումը, կապիտուլյացիան կամ իշխանափոխությունը։
Ազիզին նաև հայտարարել է, որ ԱՄՆ-ն ծանր պարտություն է կրել տարածաշրջանում։ Նրա խոսքով՝ ավելի քան 9 հազար ամերիկացի զինծառայողների դուրսբերումը Պարսից ծոցից, ամերիկյան նավատորմի և տեխնիկայի նահանջը Հնդկական օվկիանոս և տարածաշրջանից դուրս, ինչպես նաև ամերիկյան 14-ից ավելի ռազմաբազաների խոցումը վկայում են Վաշինգտոնի անհաջողությունների մասին։
«Այդ պատճառով ԱՄՆ նախագահին այլ բան չի մնում, քան ճառախոսությամբ զբաղվելը», — ասել է նա։
Ազիզին նախազգուշացրել է, որ Իրանի տարածքի դեմ ցանկացած չհաշվարկված գործողություն կստանա այնպիսի պատասխան, որը, նրա խոսքով, «կգրանցվի պատմության մեջ»։
