Ղարաղանի երկվորյակ աշտարակները՝ իրանական աղյուսե ճարտարապետության գլուխգործոց

Ղազվին նահանգում գտնվող Ղարաղանի երկվորյակ աշտարակները համարվում են սելջուկյան ճարտարապետության ամենաակնառու օրինակներից և 11-րդ դարի իրանական աղյուսագործական արվեստի եզակի նմուշներից մեկը։

Ըստ Pars Today-ի՝ հղում կատարելով Press TV-ին, արևելյան աշտարակը կառուցվել է 1068, իսկ արևմտյանը՝ 1093 թվականին. դրանք միմյանցից ընդամենը 29 մետր հեռավորության վրա են գտնվում։ Ունենալով ութանկյուն հատակագիծ՝ այս երկու դամբարանները համարվում են Իրանում կրկնակի թաղանթով գմբեթների ամենավաղ օրինակներից։

Աշտարակների արտաքին ճակատները զարդարված են աղյուսե շարվածքի ավելի քան 60 տեսակի երկրաչափական նախշերով, սրածայր կամարներով և քուֆիական արձանագրություններով, ինչի շնորհիվ դրանք արժանացել են «իրանական աղյուսագործության թանգարան» կոչմանը։

Արևելյան աշտարակի ներսում պահպանվել են նաև Սելջուկյան դարաշրջանի արժեքավոր որմնանկարներ, որոնցում պատկերված են այնպիսի մոտիվներ, ինչպիսիք են սիրամարգը, կյանքի ծառը, մզկիթի կանթեղը, ինչպես նաև վեց և ութ ճառագայթանի աստղերը։

Երկրաչափության, արվեստի, ճարտարապետության և կառուցվածքային նորարարության համադրմամբ՝ Ղարաղանի աշտարակները հանդիսանում են Սելջուկյան ժամանակաշրջանում իրանական ճարտարապետության ծաղկման տևական վկայությունը։