Փեզեշքիան․ Գազայում ԱՄՆ-ի աջակցությամբ տեղի ունեցողը ցեղասպանություն է
Համաշխարհային փոստի օրվան նվիրված միջոցառման ժամանակ Իրանի Իսլամական Հանրապետության նախագահը դատապարտեց Գազայում սիոնիստական վարչակարգի կողմից՝ Միացյալ Նահանգների աջակցությամբ իրականացված հանցագործությունները՝ դրանք որակելով որպես ցեղասպանություն։
Նա նաև քննադատության ենթարկեց մարդու իրավունքների ինքնահռչակ պաշտպաններին՝ նրանց ցուցաբերած լռության և այնպիսի սպառազինություն տրամադրելու համար, որը հնարավորություն է տալիս իրականացնել այդ վայրագությունները։
Ինչպես հաղորդում է Pars Today-ը, Մասուդ Փեզեշքիանը մատնանշեց Գազայում կանանց, երեխաների, հիվանդների և տարեցների մահվան դեպքերը՝ հարց բարձրացնելով, թե ինչ հանցագործություններ են գործել մարտի դաշտում չգտնվող այդ մարդիկ, որ արժանացել են հարձակումների թիրախ դառնալուն։ Նա բնակչության նկատմամբ կիրառվող շրջափակումը, որի հետևանքով նրանք զրկված են ջրից, հացից և առաջին անհրաժեշտության պարագաներից, որակեց որպես նրանց հնազանդեցնելուն ուղղված մարտավարություն։
Քննադատելով մարդու իրավունքների պաշտպանության ջատագովի դեր ստանձնած երկրների երկակի ստանդարտները՝ Փեզեշքիանն ընդգծեց, որ այդ պետությունները ոչ միայն լռություն են պահպանում Գազայում տեղի ունեցող իրադարձությունների վերաբերյալ, այլև աջակցում են նման գործողություններին՝ տրամադրելով զենք և ռեսուրսներ։
Իրանի նախագահը նաև բնութագրեց Միացյալ Նահանգների և նրա դաշնակիցների քաղաքականությունը՝ որպես տարածաշրջանի ռեսուրսների նկատմամբ գերիշխանություն հաստատելուն ուղղված քաղաքականություն՝ նշելով, որ ժողովրդավարության և մարդու իրավունքների վերաբերյալ նրանց հայտարարությունները հակասում են նրանց իրական գործելակերպին։