Իրանը և Ռուսաստանը պայմանավորվել են շարունակել միջուկային համագործակցությունը
Իրանի ատոմային էներգիայի կազմակերպության խոսնակ և իրավական ու միջազգային հարցերով տեղակալը և «Ռոսատոմ» պետական կորպորացիայի բարձրաստիճան պաշտոնյաները պայմանավորվել են բանակցություններ անցկացնել Իրան-Ռուսաստան միջուկային համագործակցության վերաբերյալ:
Ինչպես հաղորդում է ԻՌՆԱ լրատվական գործակալությունը՝ Ռուսաստանում Իրանի դեսպանության դիվանագիտական ծառայությունը շաբաթ օրը հրապարակել է հաղորդագրություն, որում հայտարարել է.-«Իրանի ատոմային էներգիայի կազմակերպության իրավական և միջազգային հարցերով տեղակալ Բեհրուզ Քյամալվանդին հանդիպել ու բանակցել է ռուսական «Ռոսատոմ» պետական կորպորացիայի գլխավոր տնօրեն Ալեքսեյ Լիխաչովի և կորպորացիայի միջազգային հարցերով տեղակալ Նիկոլայ Սպասկիի հետ: Հանդիպման արդյունքում կողմերի միջև պայմանավորվածություն է ձեռք բերվել կարևոր հարցերին հետամուտ լինելու նպատակով երկու երկրներից պատվիրակությունների Թեհրան և Մոսկվա գործուղման շուրջ»:
Իրանը և Ռուսաստանը պայմանավորվել են միջուկային ոլորտում ընդլայնել երկկողմ համագործակցությունը:
Բուշեհրի ատոմակայանի առաջին բլոկի կառուցումն ու շահագործումն իրականացվեց Ռուսաստանի համագործակցությամբ և այդ երկրի ու նաև իրանական ընկերությունների համագործակցությամբ ընթացքի մեջ են երկրորդ և երրորդ բլոկների կառուցման աշխատանքները:
