Իրանը միասնական է Թրամփի դիմաց
Բրիտանիայում ԻԻՀ դեսպանը հակազդելով ԱՄՆ պետքարտուղարի հակաիրանական հայտարարություններին ընդգծել է. «Թրամփի նոր քաղաքականությունների դեմ Իրանը միատարր ու միասնական է»:
ԱՄՆ պետքարտուղար Մայք Պոմպեոն երկուշաբթի օրը Իրանի կապակցությամբ նոր ռազմավարության թեմայով գումարված նիստում նշել է, որ ՀԳՀԾ-ն թերի համաձայնություն է: Նա Թեհրանին մեղադրել է իր միջուկային ծրագրում խաբեության դիմելու մեջ, հայտարարելով, թե Իրանն այս համաձայնության տնտեսական օգուտն օգտագործել է տարածաշրջանում իր նպատակների իրագործման համար:
«Այսօր ԱՄՆ-ն հրաժարվել է ՀԳՀԾ-ից և իր դաշնակիցների համագործակցությամբ թույլ չի տալու, որ Իրանն իր տիրակալությունը տարածի Միջին Արևելքում»,-հայտարարել է Մայք Պոմպեոն:
ԻՌՆԱ-ի հաղորդման համաձայն, Համիդ Բաիդինեժադն իր «Ինսթագրամ»-ի էջում կատարած գրառման մեջ նշել է, որ միջազգային անվտանգության շուրջ հետազոտություն կատարող հաստատություններն ու քաղաքագետներն Իրանի հանդեպ ԱՄՆ-ի վարչակազմի հայտարարած քաղաքականությունը պատրանք են համարել ու դա անիրագործելի են բնութագրել: Նա ասել է. «Դեպի «զրոյական հարստացում» քաղաքականություն կատարված վերադարձը նշանակում է, որ ԱՄՆ-ի դիտանկյունից ՀԳՀԾ-ն անսրբագրելի է»:
Բաիդինեժադն ընդգծել է, որ ՀԳՀԾ-ն ընդհանրապես մշակվել է ուրանի հարստացման հիմնական առանցքի շուրջ և առանց ուրանի հարստացման ծրագրի, այն նույնիսկ հնարավոր չէ սրբագրել: Նա հավելել է. «Թրամփը, նոր քաղաքականություն ներկայացնելու փոխարեն, առավել քան երբևէ ցուցադրեց իր իմպերիալիստ ու պատրանքներով հագեցած էությունը»:
