Մեկնաբանություն. Անդրադարձ՝ Նախագահ Ռայիսիի երկրորդ անգամ մասնակցությանը ՄԱԿ-ի Գլխավոր ասամբլեայի նստաշրջանին
Իրանի Իսլամական Հանրապետության նախագահը գործադիր իշխանության ղեկավարի պաշտոնում իր երկամյա գործունեության ընթացքում, երկրորդ անգամ մեկնեց Նյու Յորք՝ ելույթ ունենալու ՄԱԿ-ի Գլխավոր ասամբլեայի 78-րդ նստաշրջանում:
Սեյեդ Էբրահիմ Ռայիսիի այս ուղևորության ծրագրերից են լինելու՝ Գլխավոր ասամբլեայում ելույթով հանդես գալը, պետությունների ղեկավարների հետ հանդիպումների անցկացումը և ԱՄՆ-ում բնակվող իրանցիների հավաքում ելույթ ունենալը: ԱՄՆ-ում քաղաքական, սոցիալական, կրոնական և լրատվական խմբերի ու պատասխանատու անհատների հետ հանդիպումներում Իրանի Իսլամական Հանրապետության նախագահը լուսաբանելու է Իրանի դիրքորոշումները և պատասխանելու է նրանց հարցերին:
Իրանի Իսլամական Հանրապետության նախագահի այցը Նյու Յորք պետք է շատ առումներով կարեւոր համարել, քանի որ այն համարվում է միջազգային զարգացումների վերաբերյալ Իրանի տեսակետներն արտահայտելու հնարավորություն: Փաստորեն Գլխավոր ասամբլեայի ամենամյա նիստերը, որպես ամենակարևոր միջազգային իրադարձություն, հարմար առիթ են միջազգային քաղաքական խորհրդակցությունների համար, և աշխարհի երկրների բարձրաստիճան պաշտոնյաների մեծ մասի ներկայության բերումով ապահովում են նաև երկկողմ հանդիպումների և երկխոսության անցկացում։
Իրանի Իսլամական Հանրապետության նախագահը ՄԱԿ-ի Գլխավոր ասամբլեայի նստաշրջանին մասնակցելու պատճառը համարելով Իսլամական Հանրապետության տեսակետների ներկայացումը, ասել է,-«ՄԱԿ-ը և Գլխավոր ասամբլեան հարմար հարթակ են Իրանի Իսլամական Հանրապետության տեսակետներն ու կարծիքներն արտահայտելու համար, տեսակետ, որում ցանկալի աշխարհը աղքատությունից զերծ աշխարհ է, միջուկային զենքից և զանգվածային սպանություններից, անարդարությունից ու խտրականությունից զերծ աշխարհ,որտեղ ուշադրություն է դարձվում մարդկային արժանապատվությանը, և աշխարհում առկա հնարավորություններն օգտագործվում են բնական աղետները և գերիշխանական քաղաքականության հետևանքով առաջացած տառապանքները կանխելու ուղղությամբ»:
Իրանի Իսլամական Հանրապետության նախագահի Նյու Յորք կատարած այցի մյուս կարևոր կետն այն է, որ այս տարի ՄԱԿ-ի Գլխավոր ասամբլեայի նիստն անցկացվում է մի իրավիճակում, երբ Իրանի Իսլամական Հանրապետությունն անցած մեկ տարվա ընթացքում կարողացել է ստեղծել նոր ու տարբեր մթնոլորտ տարածաշրջանի այլ երկրների և կառույցների հետ դիվանագիտության և խորհրդակցությունների համար: Այս ընթացքում Իրանի Իսլամական Հանրապետությունը կարողացավ անդամակցել Շանհային և ԲՐԻԿՍ-ին: Բարելավեցին Իրանի հարաբերությունները հարևան երկրների հետ, այնպես, որ Իրանի և Սաուդյան Արաբիայի միջև դիվանագիտական հարաբերությունների վերահաստատումից հետո, մի շարք այլ արաբական երկրներ, որոնք տարաձայնություններ ունեին Իրանի հետ, այժմ ցանկանում են ընդլայնել իրենց հարաբերությունները այս երկրի հետ:
Իսկ Իրանն ու ԱՄՆ-ն գտնվում են անուղղակի և քայլ առ քայլ բանավոր բանակցությունների գործընթացում, որպեսզի եթե Միացյալ Նահանգները հավատարիմ մնա իր բոլոր պարտավորություններին, ապա պատժամիջոցների վերացման բանակցությունների համար ավելի հստակ հեռանկար կստեղծվի: Ուստի, նկատի ունենալով, որ Իրանի Իսլամական Հանրապետությունը բանակցությունների գործընթացում միշտ ցուցաբերել է համագործակցության ամենաբարձր մակարդակը, Գլխավոր ասամբլեայի հանդիպման շրջանակներում, նախագահների հանդիպումները կարող են առիթ հանդիսանալ բոլոր երկրներին խրախուսելու՝ աջակցել այդ բանակցությունների գործընթացին:
Այս առնչությամբ ավելի վաղ Իրանի արտաքին գործերի նախարարության խոսնակ Նասեր Քանանին հայտարարել էր, որ ՄԱԿ-ի նիստի շրջանակում պատժամիջոցների վերացման շուրջ բանակցությունների շարունակման հնարավորություն կա։
Ուստի, Իրանի Իսլամական Հանրապետության նախագահի ներկայությունը ՄԱԿ-ի Գլխավոր ասամբլեայում պետք է դիտարկել որպես հնարավորություն՝ արտացոլելու Իրանի Իսլամական Հանրապետության սկզբունքային դիրքորոշումները այս միջազգային կառույցի պաշտոնական ամբիոնից, ինչը նաև հնարավորություն կստեղծի Իրանի Իսլամական Հանրապետության քաղաքականության և նպատակների իրագործման ուղղությամբ դիվանագիտական խորհրդակցությունների համար :