Մեկնաբանություն- Գազայի պաշարված ժողովուրդը սպասում է համաշխարհային օգնության

ՄԱԿ-ի գլխավոր քարտուղար Անտոնիո Գուտերեշը Կահիրեի խաղաղության համաժողովում իր ելույթում ասել է.«Մենք հանդիպում ենք մի տարածաշրջանում, որը տառապում է ցավից և կանգնած է անդնդի եզրին: Տարածաշրջան, որտեղ անհնար է խորապես չտրտմել՝ տեսնելով ժողովրդի ցավի ու տառապանքի պատկերները»:

Իրաքի վարչապետ Մոհամմադ Ալ-Սուդանին Կահիրեում կայացած հանդիպմանն ասել է.«Եթե ​​օրինական իրավունքներ ունեցող ազգի խոսքը լսվեր և հարգվեին միջազգային բանաձևերը, Պաղեստինի հարցը այս կետին չէր հասնի։ Իրաքը կտրականապես մերժում է Գազայի հատվածից պաղեստինցիների ցանկացած բռնի գաղթ և մերժում է տները լքելու մասին կոչերը։ Մենք ցանկանում ենք հրադադարի հաստատում և անցումների բացում դեպի Գազայի հատված, այնուհետև գերիների և կալանավորների փոխանակում»:

Վերջին 16 օրերի ընթացքում (հոկտեմբերի 7) «Ալ-Աղսայի փոթորիկը» գործողության սկզբից ի վեր, մի կողմից, բնակելի և հասարակական տարածքների ռմբակոծությունները, մյուս կողմից՝ ջրի, էլեկտրաէներգիայի և սննդի ու դեղորայքի խիստ պակասը ստեղծել են կրիտիկական իրավիճակ Գազայի պաղեստինցի բնակիչների համար և իրավապաշտպան կազմակերպություններն աննկարագրելի են համարել այս տարածաշրջանում տիրող մարդկային իրավիճակը:

ՄԱԿ-ի գործակալությունները, այդ թվում՝ ՄԱԿ-ի զարգացման ծրագիրը, ՄԱԿ-ի բնակչության հիմնադրամը, ՅՈՒՆԻՍԵՖ-ը, Պարենի համաշխարհային ծրագիրը և Առողջապահության համաշխարհային կազմակերպությունը հայտարարության մեջ նշել են.«Մենք կոչ ենք անում դադարեցնել կրակը, ինչպես նաև անհապաղ և անսահմանափակ մարդասիրական օգնությունների հասանելիություն Գազայի հատվածում, որպեսզի մարդասիրական ոլորտի ակտիվիստները կարողանան օգնել կարիքավոր խաղաղ բնակիչներին, փրկել կյանքեր և կանխել հետագա մարդկային աղետները»:

Գազայում UNRWA-ի գործողությունների տնօրենն ասել է, որ իրավիճակը շատ լուրջ է, իսկ մարդասիրական օգնությունը՝ խիստ սահմանափակ։ Սնունդն ու խմելու ջուրը սակավ են։ Գազայի հատվածում աղետը կանխելու համար մեզ անհրաժեշտ է մարդասիրական օգնության մշտական ​​գիծ։

Շաբաթ օրը եգիպտական ​​Կարմիր մահիկի, Առողջապահության համաշխարհային կազմակերպության և Պարենի համաշխարհային ծրագրի մարդասիրական օգնություն տեղափոխող առաջին շարասյունը, որը բաղկացած էր 20 բեռնատարներից, մտավ Գազայի հատված՝ Ռաֆահ անցակետի ժամանակավոր վերաբացմամբ: Սակայն վառելիքը, որն այս տարածաշրջանի բնակիչների հրատապ կարիքն է, այդ ապրանքների թվում չկա, և վառելիքի պակասի պատճառով փակվել է Գազայի միակ էլեկտրակայանը, իսկ հիվանդանոցները էլեկտրաէներգիայի բացակայության և գեներատորների խափանման պատճառով կատարյալ մթության մեջ են, ինչը սպառնում է հազարավոր հիվանդների կյանքին։

ՄԱԿ-ի մանկական հիմնադրամը (ՅՈՒՆԻՍԵՖ) հայտարարել է, որ շաբաթ օրը Ռաֆահ անցակետով ավելի քան 44 հազար շիշ խմելու ջուր է տեղափոխել Գազայի հատված, սակայն այդ չափը բավարարում է միայն 22 հազար մարդու մեկ օրվա համար։

ՅՈՒՆԻՍԵՖ-ի գործադիր տնօրեն Քեթրին Ռասելը մամուլի հաղորդագրության մեջ ասել է.«Սահմանափակ օգնության այս առաջին փուլը կարող է ոմանց փրկել մահից, սակայն կարիքները հրատապ են ու մեծ, ոչ միայն ջրի, այլ սննդի, վառելիքի, դեղորայքի և առաջին անհրաժեշտության ապրանքների և ծառայությունների համար: Եթե ​​մենք չկարողանանք շարունակել մարդասիրական օգնությունները, կբախվենք Գազայի բնակչության կյանքին ուղղված հիվանդությունների իրական սպառնալիքին։

Միջազգային կազմակերպությունների տվյալներով՝ վերջին երկու շաբաթվա ընթացքում Գազայի հատվածում տեղահանվել է մոտ մեկ միլիոն մարդ, որոնց կեսը երեխաներ են, և նրանցից շատերը ապաստանել են գերբնակեցված ապաստարաններում՝ ջրի և սանիտարահիգիենիկ պայմանների խիստ սահմանափակ հասանելիությամբ. Իրավիճակ, որը վտանգավոր է հատկապես փոքր երեխաների համար:

Վերջին 16 օրերի ընթացքում Գազայի հատվածի վրա Սիոնիստական ​​ռեժիմի հարձակումների հետևանքով զոհվել է ավելի քան հինգ հազար մարդ, վիրավորվել 13 հազար մարդ, իսկ մեկ միլիոն ուրիշներ տեղահանվել են: Ամեն պահ այս թվերն ավելանում են և այժմ Գազան ավելի քան երբևէ ենթարկվում է մարդկային աղետի: Օգնության անհապաղ տրամադրումը կարող է որոշ չափով նվազեցնել այս հումանիտար ճգնաժամը, սակայն հարձակումների շարունակվելը, հատկապես եթե ցամաքային հարձակում տեղի ունենա, անկասկած կմեծացնի այս ճգնաժամի խորությունն ու ծավալը։