Թուրքիայի դեմ Ավստրիայի կտրուկ դիրքորոշումը
Ավստրիան Եվրամիությունում դարձել է Թուրքիայի մեծագույն քննադատողը: Այնպիսի օր չկա, որ Ավստրիայի ավագ պաշտոնատարներից մեկը Թուրքիայի դեմ կարծիք չհայտնի:
«ԵՄ-ն Թուրքիային անդամակցության փոխարեն պետք է համագործակցության նոր ձևաչափ առաջարկի»։ Այս մասին ավստրիական «Die Presse» թերթին տված հարցազրույցում ասել է Ավստրիայի կանցլեր Քրիստիան Քերնը։
Նա կոչ է արել տնտեսության, անվտանգության և միգրացիայի ոլորտներում կողմերի համագործակցության պլան մշակել, որը կարտահայտեր իրականությունը։ «Մինչ մենք կառչել ենք ԵՄ-ին անդամակցելու շուրջ Թուրքիայի հետ բանակցություններին, մենք ժամանակ ենք կորցնում համագործակցության նոր ձևեր մշակելու համար»,– ասել է Ավստրիայի կանցլերը։
Նա նշել է, որ Վիեննան մտադիր է Եվրամիության մակարդակով հանդես գալ Թուրքիայի անդամակցության մասին բանակցությունների դադարեցման նախաձեռնությամբ։
Կանցլերի խոսքով՝ դա չպետք է սպառնալիքի տակ դնի միգրացիոն գործարքը, որի շրջանակում ԵՄ-ի անդամ երկրները կարող են ապօրինի փախստականներին հետ ուղարկել Թուրքիա ։
Իսկ Ավստրիայի ԱԳ նախարար՝ Սեբիաստիան Կուրցը տարակուսանք է հայտնել Թուրքիայի հետ փախստականների վերաբերյալ կնքված համաձայնագրի հաջողության վերաբերյալ,ասելով՝ Եվրոպան չպետք է շանտաժի ենթարկվի և ավելի լավ է Եվրոպան ինքն անձամբ պաշտպանի իր սահմանները:
Սիրիացի փախստականների Եվրոպա ներհոսքը վերահսկելու վերաբերյալ Թուրքիայի հետ ԵՄ-ի համաձայնությունը դարձել է մեծ խնդիր այդ միության համար:
Ավստրիան այդ համաձայնագրի գլխավոր ընդդիմադիրն է: Թուրքիայի կառավարությունը սպառնացել է, որ Միգրացիոն համաձայնագրի հետագա իրականացումը կվտանգվի, եթե ԵՄ-ն մինչև հոկտեմբերի վերջը Թուրքիայի հետ առանց վիզայի ռեժիմ չսահմանի: «Մենք պայմանավորվածություն ունենք, համաձայն որի` հոկտեմբերին Թուրքիայի հետ առանց վիզայի ռեժիմ պետք է սահմանվի: Կա'մ երկու կողմը ժամանակին իրականացնում են բոլոր պայմանները, կա'մ մենք չեղարկում ենք բոլոր պայմանավորվածությունները»,- հայտարարել է Թուրքիան:
Թուրքիայի այդ հայտարարությունը զայրացրել է որոշ եվրոպական երկրներին,այդ թվում Ավստրիային: Գերմանիայի որոշ դիվանագետներ ևս քննադատել են Թուրքիայի որդեգրած այդ դիրքորոշումը:Նրանք Անգելա Մերկելին կոչ են արել վերանայել Թուրքիայի հետ կնքած միգրացիոն համաձայնագիրը:
ԵՄ-ին անդամակցության փոխարեն Թուրքիան համագործակցության նոր ձևաչափ ներկայացնելու Ավստրիայի կանցլերի առաջարկը նորություն չէ: Ֆրանսիայի նախկին նախագահ՝ Նիկոլա Սարկոզին ևս ներկայացրել էր ԵՄ-ին անդամակցության փոխարեն Թուրքիայի հետ հատուկ համագործակցության նախագիծը: Անգելա Մերկելն էլ պաշտպանել էր նախագիծը:
Թուրքիայում ձախողած հեղաշրջումը և Ռեջեբ Թայիբ Էրդողանի ցուցաբերած հակազդեցությունը հանգեցրել է Թուրքիայի և ԵՄ-ի միջև տիրող լարվածության սրմանը:
Եվրոպական խոշոր պետությունները, ինչպես Գերմանիան պաշտոնական դիրքորոշում չեն որդեգրել փախստականների հարցով Թուրքիայի հետ կնքած միգրացիոն համաձայնագրի վերաբերյալ: Գերմանիայի պետայրերն ու դիվանագետները քաջ գիտեն,որ փախստականների մուտքը Եվրոպա վերահսկելու ազդեցիկ ուղիներից մեկը Թուրքիայի հետ համագործակցությունն է, այդիսկ պատճառով Թուրքիայի դեմ Ավստրիայի կտրուկ հակազդեցությանը չեն արձագանքել Եվրոպական պետությունները: Իհարկե Թուրքիան ևս գիտակցում է ԵՄ-ի հետ միգրացիոն համաձայանգրի նշանակությունը և այդ միության հետ համագործակցության հեռանկարը: Կողմերը մերթ ընդ մերթ կտրուկ դիրքորոշումներով հանդես գալով նպատակ ունեն դիմացի կողմից առավելագույն արտոնությունը ստանալ: