ԵՄ-ն երկարաձգել է Ռուսաստանի դեմ պատժամիջոցների ժամկետը
ԵՄ անդամ երկրների ներկայացուցիչները հինգշաբթի օրը Բրյուսելում գումարած նիստում կողմ քվեարկեցին Ռուսաստանին՝ Ղրիմի թերակղզու միացումը պաշտպանելու պատճառով 146 ռուս և ուկրաինացի պաշտոնատարների և 37 ռուսական կառույցների դեմ պատժամիջոցների գործադրման ժամկետի վեցամսյա երկարաձգմանը:
Պատժամիջոցները ներառում են ակտիվների սառեցում և դեպի ԵՄ ուղևորության արգելում:
ԵՄ-ն խիստ քննադատել է Ղրիմի թերակղզին իր տարածքին միացնելու Ռուսաստանի քայլը: Այն ֆիզիկական անձինք ու կազմակերպությունները, որոնց դեմ ԵՄ-ն պատժամիջոցներ է գործադրել, մեղադրվում են Ուկրաինայի տարածքային ամբողջականության, ինքնիշխանության ու անկախության դեմ քայլեր ձեռնարկելու մեջ: ԵՄ-ն հայտարարել է, որ այս պատժամիջոցները, որոց գործադրումը սկսվել է 2014 թվականից, կշարունակվեն մինչև 2017 թվականի մարտի 15-ը: Ռուսաստանի երկու փոխվարչապետներ Դիմիտրի Կոզակն ու Դիմիտրի Ռագոզինը պատժամիջոցների ցուցակում ներառված պաշտոնատարներից են: Ռուսաստանի տնտեսության դեմ սահմանված շրջափակումների գործադրման ժամկետը կավարտվի 2017 թվականի հունվարի վերջին և այդ պատճառով ԵՄ-ի ղեկավարները մտադիր են իրենց հոկտեմբերյան նստաշրջանում այդ կապակցությամբ որոշում ընդունել:
ԵՄ-ն ու ԱՄՆ-ն Ռուսաստանին մեղադրում են Ուկրաինան անկայունացնելու մեջ, մինչդեռ Մոսկվան մերժում է այդ ճգնաժամին իր ցանկացած տեսակի միջամտությունը: Արևմուտքը Ռուսաստանի դեմ ճնշում գործադրելով նպատակ ունի պարտադրել փոխել Ուկրաինայի ճգնաժամի կապակցությամբ իր դիրքորոշումը և հատկապես հրաժարվել Ուկրաինայի արևելքի ընդդիմությանը պաշտպանելուց: Մոսկվան բազմիցս հայտարարել է, որ քանի դեռ Կիևի արևմտամետ կառավարության և ԱՄՆ-ի ու ԵՄ- կողմից իր շահերն ու պահանջները չեն հարգվել, չի փոխելու Ուկրաինայի ճգնաժամի հանդեպ իր դիրքորոշումը: Միևնույն ժամանակ Ռուսաստանը միայն դիտորդի դերում հանդես չի եկել և փոխադարձ քայլի դիմելով մինչև այսօր պատժամիջոցների մի քանի փաթեթներ է գործադրել ԵՄ-ի ու ԱՄՆ-ի դեմ:
Նկատի առնելով , որ մինչև Ուկրաինայի ճգնաժամի սկսվելը ԵՄ-ն համարվում էր Ռուսաստանի առևտրական ամենախոշոր գործընկերը, բնականաբար Մոսկվայի կողմից սահմանված պատժամիջոցները մեծ վնաս են պատճառել եվրոպական երկրներին: Դա պատճառ է դարձել, որ Ռուսաստանի դեմ պատժամիջոցները շարունակվելու կամ դադարեցվելու հարցով ԵՄ-ում բացահայտ քննադատություններ հնչեն : Իրականում Ռուսաստանի դեմ պատժամիջոցների կապակցությամբ երկու ընդհանուր տեսակետ գոյություն ունի: Առաջին խմբի երկրներն ու հատկապես նրանք, որոնք սերտ կապեր ունեն ԱՄՆ-ի հետ պնդում են, որ մինչև Ուկրաինայի հարցով արևմուտքի պահանջներին ռուսների հանձնվելը, Մոսկվայի դեմ պատժամիջոցների գործադրումը պիտի շարունակվի: Ի պատասխան, ԵՄ անդամ այն երկրները, որոնք մինչև Ուկրաինայի ճգնաժամի սկսվելը առևտրական ու տնտեսական ծավալուն հարաբերություններ են ունեցել Ռուսաստանի հետ և այդ հարաբերությունների սահմանափակման կամ դադարեցման պատճառով ֆինանսական ու տնտեսական մեծ վնաս են կրել, պահանջում են չեղարկել Ռուսաստանի դեմ սահմանված պատժաիջոցները:Այս երկրները պարտավորվել են իրենց համաձայնությունը տալ Ռուսաստանի դեմ պատժամիջոցների փաթեթի գործադրումը շարունակվելուն, սակայն նրանց դիտանկյունից այս ընթացքն անտրամաբանական է ևպետք է վերանայվի: