Իրաքի իշխանությունները Պոմպեոյին.«Բաղդադը հավատարիմ է Թեհրանի հետ բարեկամությանը»
Իրաքի վարչապետը և հանրապետության նախագահը խոսքն ուղղելով ԱՄՆ պետքարտուղարին ընդգծել են.«Բաղդադը կշարունակի համագործակցությունն ու բարեկամությունը իր բոլոր հարևան երկրների, այդ թվում՝ Իրանի հետ»:
ԱՄՆ պետքարտուղար Մայք Պոմպեոն երեքշաբթի օրը քանիժամյա անակնկալ այց է կատարել Իրաք: Նա առանձին հանդիպում ու բանակցություն է ունեցել Իրաքի վարչապետ Ադել Աբդոլմեհդիի և նախագահ Բարհամ Սալեհի հետ:
Իրաքի վարչապետի գրասենյակից ԻՌՆԱ լրատվական գործակալությունը հաղորդել է, որ Մայք Պոմպեոյի հետ հանդիպման ժամանակ, Ադել Աբդոլմեհդին ընդգծել է.«Իրաքի արտաքին հարաբերությունները հիմնված են ազգային շահերի գերակայության վրա»:
Իրաքի նախագահի գրասենյակը տարածել է հայտարարություն, որում նշել է.«Բարհամ Սալեհը Մայք Պոմպեոյի հետ հանդիպման ժամանակ ասել է.«Բաղդադը, չնայած Միացյալ Նահանգների հետ համագործակցելուն, հավատարիմ է Իրանի հետ բարեկամությանը»»:
Բարհամ Սալեհը հավելել է.«Բաղդադի արտաքին հարաբերությունները հիմնված են ազգային շահերի գերակայության և համագործակցությունների ընդլայնման վրա»:
