Սաուդյան Արաբիայում բացվել է Չինաստանի բանկի առաջին մասնաճյուղը
Bank of China (BOC)-ն, Չինաստանի չորս խոշոր պետական առևտրային բանկերից մեկը, իր առաջին մասնաճյուղն է բացել Սաուդյան Արաբիայի մայրաքաղաք Ռիադում: Այս կերպ Չինաստանը կընդլայնի յուանի կիրառումն առևտրում:
IRNA-ն հղում անելով Global Times կայքին, հաղորդում է, որ ըստ փորձագետների՝ ԲՐԻԿՍ-ի գագաթնաժողովից հետո այս տնտեսական բլոկի անդամներն արագացրել են միջազգային առևտրում տեղական արժույթների կիրառման գործընթացը, որն ուղղված է ԱՄՆ դոլարից կախվածությունը նվազեցնելուն:
Անդամ երկրները հայտարարել են, որ չինական արժույթը կարևոր դեր է խաղում ԲՐԻԿՍ-ի երկրների միջև առևտրի դյուրացման և համագործակցության մեծացման հարցում։
Փորձագետները կարծում են, որ յուանի կիրառման ընդլայնումը վկայում է ֆինանսական արդյունավետության և արտաքին առևտրի ծավալները բարձրացնելու նպատակով տեղական արժույթների կիրառման հարցում ԲՐԻԿՍ-ի երկրների միջև փոխադարձ վստահության մասին: Բացի այդ, անդամ երկրների միջև առևտրուրը սեփական արժույթով կամ յուանով իրականացնելը կարող է թույլ տալ խուսափել փոխարժեքի կորուստներից։
ԲՐԻԿՍ անդամները նշում են, որ այդ գործընթացը կնպաստի առևտրի ծավալների մեծացմանը և թույլ չի տա ԱՄՆ-ին դոլարն օգտագործել որպես տնտեսական զենք որոշ երկրների նկատմամբ պատժամիջոցներ կիրառելու համար։
