Politico. ԵՄ-ն ձմռանը կբախվի 14 միլիարդ խորանարդ մետր գազի պակասի
Politico-ն զգուշացրել է, որ ԵՄ անդամ երկրները գալիք ձմռանը կարող են բախվել 14 միլիարդ խորանարդ մետր բնական գազի պակասի, ինչը կազմում է տարեկան պահանջարկի մոտ յոթ տոկոսը։ Այս ճգնաժամը սրվում է էներգակիրների համաշխարհային մատակարարումների խափանումների և եվրոպական գազի պաշարների նվազման հետևանքով։
Հղում կատարելով ԱՄՆ-ում գործող Էներգետիկ տնտեսագիտության և ֆինանսական վերլուծության ինստիտուտի (IEEFA) տվյալներին՝ Politico-ն հայտնել է, որ հոկտեմբերի սկզբին ԵՄ-ում գազի ստորգետնյա պաշարները կազմել են տարողության 70 տոկոսից մի փոքր ավելին. սա տարվա այս ժամանակահատվածի համար գրանցված ամենացածր ցուցանիշն է՝ սկսած 2011 թվականից, երբ սկսվել է տվյալների հաշվառումը։
Ըստ զեկույցի՝ գազի գները մոտեցել են վերջին չորս տարվա առավելագույն ցուցանիշին, իսկ հնարավոր պակասը կարող է ազդել 10-12 միլիոն եվրոպական տնային տնտեսությունների էներգամատակարարման վրա։
Ռուսաստանից հեղուկացված բնական գազի ներկրման երկարաժամկետ պայմանագրերի՝ 2027 թվականի հունվարին նախատեսվող արգելքը կարող է լրացուցիչ 7 միլիարդ խորանարդ մետրով կրճատել Եվրոպա կատարվող ներկրման ծավալները։ Միաժամանակ, Եվրոպական հանձնաժողովն անհրաժեշտ է համարում գազի և էլեկտրաէներգիայի սպառման կրճատումը՝ գները զսպելու և էներգետիկ ճգնաժամը հաղթահարելու նպատակով։