Իսրայելը մտադիր է ընդմիշտ գրավել Գազայի մի քանի կետեր
Pars Today – Սիոնիստական «Kan» հեռուստաալիքը հաղորդել է մի ծրագրի մասին, որի համաձայն՝ Թել Ավիվը մտադիր է պահպանել իր ռազմական ներկայությունը Գազայի երեք ռազմավարական տարածքներում, նույնիսկ հրադադարից և գերիների փոխանակման մասին համաձայնության իրագործումից հետո։
Pars Today-ի փոխանցմամբ՝ ԱՄՆ կառավարությանը ներկայացված ծրագրում իսրայելցի պաշտոնյաները հայտարարել են երեք կարևոր կետերում, այդ թվում՝ Գազայի հատվածի ներսում գտնվող բուֆերային գոտում, Գազա-Եգիպտոս սահմանին գտնվող Ֆիլադելֆիայի անցուղում և Գազայի արևելքում գտնվող 70 կամ Թել ալ-Մանթար կոչվող բլրի տարածքում, երկարաժամկետ օկուպացիան պահպանելու իրենց որոշման մասին։ Kan-ը պնդում է, որ այս տարածքները կենսական նշանակություն ունեն Իսրայելի համար ռազմական առումով, քանի որ ապահովում են Հյուսիսային Գազայի, Գազա քաղաքի և Ջաբալիա ճամբարի նկատմամբ լիակատար տեսանելիություն և վերահսկողություն։
Հաղորդման համաձայն՝ Թել Ավիվը Վաշինգտոնին տեղեկացրել է, որ այդ տարածքներում ռազմական ներկայությունը պահպանելը անհրաժեշտ է «դաշտային և հսկողության գերակայություն ունենալու» համար, և ԱՄՆ-ն, հասկանալով այս անհրաժեշտությունը, չի առարկել։
Առաջարկվող ծրագիրը բաղկացած է մի քանի փուլից. Առաջին փուլում իսրայելական ուժերը գերիների փոխանակումից հետո դուրս կգան հակամարտության գոտիներից, բայց ժամանակավորապես կմնան Գազայի ներսում գտնվող «դեղին գծի» վրա: Այնուհետև, անվտանգային իրավիճակի կառավարման համար նախատեսված ամերիկյան առաքելության ղեկավարման ներքո գտնվող օտարերկրյա ուժերի ժամանումից հետո, իսրայելական բանակը կնահանջի մինչև «կարմիր գծի» մոտ և վերջապես կդիրքավորվի Գազայի սահմաններում՝ Ֆիլադելֆիայի անցուղու և արևելյան Գազայի ռազմավարական բլրի վերահսկողությունը պահպանելու համար:
Միևնույն ժամանակ, էմիրաթական «Ալ-Այն» թերթը հաղորդել է, որ Իսրայելը, Համասի հետ անուղղակի բանակցություններում, պահանջել է պահպանել ներկայությունը Ֆիլադելֆիայի և Մորաջի անցուղիների միջև ընկած տարածքում, սակայն Համաս շարժումը կտրականապես մերժել է այս պահանջը և պնդում է օկուպացիոն ուժերի լիակատար դուրսբերումը Գազայի ամբողջ տարածքից:
Ըստ այս թերթի՝ Թել Ավիվը ձգտում է ստեղծել մի քանի հարյուր մետրից մինչև մի քանի կիլոմետր բուֆերային գոտի Գազայի ներսում. սա մի քայլ է, որը նաև հակասում է Թրամփի ծրագրին, քանի որ դրա համաձայն՝ սիոնիստական ռեժիմին թույլատրվում է ներկայություն պահպանել միայն սահմանափակ «անվտանգ գոտում»: Բոլոր բանակցություններում Համասը Գազայի կառավարումը համարում է Պաղեստինի ինքնավարության բացառիկ իրավունքը և մերժում է օկուպացիոն ռեժիմի կողմից այս գործընթացին ցանկացած միջամտություն։