Թուրքիայում շարունակվում է հեղաշրջման փորձի գիշերվա «խավարը». Էրդողան
Թուրքիայի նախագահ Ռեջեփ Թայիփ Էրդողանը հայտարարել է, որ երկրում դեռևս ավարտված չէ 2016թ.-ի հեղաշրջման փորձի գիշերվա «խավարը», այս մասին գրում է թուրքական «Անադոլու» գործակալությունը:
«Դեռ չի ավարտվել, նրանք դեռ չեն ավարտել իրենց գործը»,- ասել է Էրդողանն ու կոչ արել ժողովրդին ապրիլի 16-ին սպասվելիք սահմանադրական փոփոխությունների վերաբերյալ հանրաքվեի ժամանակ կողմ քվեարկել կառավարման նախագահական համակարգին, որպեսզի «լուծվեն երկրի առաջ ծառացած բոլոր խնդիրները»:
Էրդողանը նախագահական համակարգին դեմ գնացողներին համեմատել է ահաբեկիչների, հեղաշրջման փորձի մասնակիցների ու քուրդ զինյալների հետ:
Հիշեցնենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին:18 հոդվածից բաղկացած օրենքի ընդունմանը կողմ է քվեարկել 339 պատգամավոր: Սահմանադրական փոփոխությունների հարցով հանրաքվեն կանցկացվի ապրիլի 16-ին։
tert.am/
