Դամասկոս.«Սիրիայի տարածքում Թուրքիայի ներկայությունը անօրինական է»
Սիրիայի ԱԳ նախարարության մի աղբյուր հայտարարել է,որ Սիրիայի ապաէսկալացման շրջանների վերաբերյալ Աստանայի բանակցություններում ձեռք բերված համաձայնությունները օրինականություն չեն շնորհում Սիրիայի տարածքում Թուրքիայի ներկայությանը:
Ինչպես հաղորդում է «Սանա» լրատվական գործակալությունը, Սիրիայի ԱԳ նախարարության մի աղբյուր շաբաթ օրը հայտարարել է, որ Սիրիայի տարածքում Թուրքիայի ներկայությունը Դամասկոսի համար շարունակում է մնալ անօրինական:
Հիշյալ աղբյուրը ընդգծել է, որ Դամասկոսը հավատարիմ է Սիրիայի ճգնաժամի քաղաքական ճանապարհով կարգավորմանը հանգեցնող ցանկացած նախագծի կամ դրական գործակցությանը: «Սիրիան մինչ այսօր դրական մասնակցություն է բերել Աստանայի վեց փուլ բանակցություններին»․ հավելել է աղբյուրը:
Սիրիայի հարցով Աստանայում անցկացված բանակցությունների վեցերորդ փուլում Ռուսաստանի, Իրանի ու Թուրքիայի ներկայացուցիչները հրապարակել են համատեղ հաղորդագրություն,որում կարևորել են այդ երկրում տիրող ճգնաժամի կարգավորմանն ուղղված ջանքերի շարունակումը:
