Սիրիայի հյուսիսի դեմ Թուրքիայի բանակի հարձակումների ընթացքում խաղաղ բնակիչներ են զոհվել
Սիրիական աղբյուրները տեղեկացրել են Սիրիայի հյուսիսային քրդաբնակ տարածքների դեմ Թուրքիայի անցած մեկ շաբաթվա հարձակումների ընթացքում 284 խաղաղ քաղաքացիների զոհվելու և վիրավորվելու մասին:
Սիրիայի պաշտոնական լրատվական գործակալություն՝ ՍԱՆԱ-ն շաբաթ երեկոյան հայտարարեց. «Թուրքիայի բանակի անցած մեկ շաբաթվա ընթացքում Աֆրինի տարածքի ու դրա մերձակա գյուղերի դեմ իրականացրած հարձակումների հետևանքով զոհվել են 86 սիրիացիներ և 198 ուրիշներ վիրավորվել են»:
Համաձայն այս հաղորդման, Թուրքիան տարբեր տրամաչափի զենքերով հարձակում է իրականացրել Հալեպից դեպի հյուսիս 63կմ հեռավորության վրա գտնվող Աֆրինի տարածքի վրա և հրի ու սրի քաշելով ժողովրդին, ավերել է հանրային կառույցները:
Տեղական աղբյուրները հայտարարել են, որ Սիրիայի Աֆրինում Թուրքիայի ոճրագործության զոհերի գլխավոր մասը երեխաներ են, կանայք ու տարեցներ:
Սիրիայի ԱԳ նախարարությունը շաբաթ գիշեր դատապարտեց Աֆրինի դեմ Թուրքիայի ոտնձգությունը և միջազգային հանրությանը կոչ արեց դատապարտելով այդ ոճրագործությունը, դրա դադարեցման ուղղությամբ քայլեր ձեռնարկել:
Ի դեպ, անցած շաբաթվանից Թուրքիայի բանակի հարձակումների թիրախ դարձած Աֆրին քաղաքի քրդերն ուրբաթ գիշեր մի հաղորդագրությամբ Թուրքիայի ոտնձգությանը դիմակայելու համար Դամասկոսի աջակցությունը խնդրեցին:
Հիշեցնենք, որ հայկական աղբյուրների հաղորդման համաձայն՝ Աֆրինում Թուրքիայի իրականացրած հարձակումների զոհերի ու վիրավորների թվում հայեր կան:
