Էրդողանն ու Քերին հանդիպել են Վաշինգտոնում Թուրքիայի դեսպանատանը
Թուրքիայի նախագահ Ռեջեփ Թայիփ Էրդողանն ԱՄՆ մայրաքաղաք Վաշինգտոնում Թուրքիայի դեսպանատանն ընդունել է Միացյալ Նահանգների պետքարտուղար Ջոն Քերիին:
Ինչպես հաղորդում է «Արմենպրես»-ը, այս մասին տեղեկացնում է թուրքական «Անադոլու» գործակալությունը:
Մամուլի համար փակ անցկացված հանդիպումը տևել է 45 րոպե: Հանդիպմանը ներկա են եղել Թուրքիայի արտգործնախարար Մևլութ Չավուշօղլուն, էներգետիկայի և բնական պաշարների նախարար Բերաթ Ալբայրաքը, արտգործնախարարության քարտուղար Ֆերիդուն Սինիրլիօղլուն, Ազգային հետախուզական ծառայության ղեկավար Հաքան Ֆիդանը, Վաշինգտոնում Թուրքիայի դեսպան Սերդար Քըլըչը, ինչպես նաև նախագահականի գլխավոր քարտուղարի տեղակալ Իբրահիմ Քալընը:
Ամերիկյան կողմից հանդիպմանը մասնակցել են «Իսլամական պետություն» ահաբեկչական խմբավորման դեմ պայքարի հարցերով ԱՄՆ նախագահ Բարաք Օբամայի հատուկ ներկայացուցիչ Բրեթ ՄըքԳուրքը և ԱՄՆ պետքարտուղարի տեղակալ Վիկտորիա Նուլանդը:
Հանդիպման ժամանակ քննարկված հարցերի շրջանակը չի հաղորդվում:
