Եվրախորհրդարանը բանաձև է ընդունել «Հյուսիսային հոսք-2» գազատարի նախագծի դադարեցման կապակցությամբ
Եվրախորհրդարանի անդամ երկրներն ընդունել են բանաձև, որով պահանջել են դադարեցնել «Հյուսիսային հոսք 2» (Nord Stream-2) գազատարի շինարարության նախագիծը: Այս մասին հաղորդել է Սպուտնիկ լրատվական գործակալությունը:
Եվրոպական խորհրդարանի անդամ երկրները կողմ են քվեարկել այն բանաձևին, որը պահանջում է դադարեցնել «Հյուսիսային հոսք – 2» գազատարի նախագիծը, որը Ռուսաստանից Բալթիկ ծովով Եվրոպա է փոխադրելու տարեկան 55 մլրդ խորանարդ մետր բնական գազ:
Եվրախորհրդարանն այդ որոշումն ընդունել է այն բանից հետո, երբ ԱՄՆ Ներկայացուցիչների պալատում դատապարտել են այդ նախագիծը:
ԱՄՆ Ներկայացուցիչների պալատը «Հյուսիսային հոսք–2» գազատարի նախագիծն այդ երկրի շահերին դեմ է գնահատել և աջակցել է դրա բոյկոտին:
«Հյուսիսային հոսք – 2» գազատարը համատեղ ներդրում է Ռուսաստանի «Գազպրոմ» և ֆրանսիական, նիդերլանդական, բրիտանական ու գերմանական ընկերությունների միջև, որը Բալթիկ ծովից անցնելով և շրջանցելով Ուկրաինան, ռուսական գազը կտեղափոխի Եվրոպա:
