Լավրով. «Միացյալ Նահանգները կորոնավիրուսը շահարկում է իր տեսակետները պարտադրելու համար»
ՌԴ ԱԳ նախարարն ասել է.«ԱՄՆ-ն և նրա դաշնակիցները կորոնավիրուսը շահարկում են համաշխարհային կարգի և բախումների սրման վերաբերյալ իրենց տեսակետներն աշխարհին պարտադրելու համար»:
Ինչպես հաղորդում է ՏԱՍՍ լրատվական գործակալությունը, ՌԴ ԱԳ նախարար Սերգեյ Լավրովը չորեքշաբթի օրը Շանհայի համագործակցության կազմակերպության (ՇՀԿ) անդամ երկրների ԱԳ նախարարների նիստում ունեցած ելույթում ասել է. «Նույնիսկ կորոնավիրուսի պանդեմիայի պայմաններում ԱՄՆ-ն և նրա գործընկերները ջանքեր են գործադրում բախումները սրելու և ներկա վիճակը շահարկելու համար, որպեսզի աշխարհակարգի վերաբերյալ իրենց տեսակետները պարտադրեն աշխարհին»:
Դատապարտելով վերջերս ԱՄՆ-ի կողմից Ռուսաստանի և Չինաստանի դեմ հնչեցված զրպարտանքները,Լավրովն ասել է. «Կորոնավիրուսի դեմ պայքարի ընթացքում միակողմանի պատժամիջոցները սառեցնելու կոչերն անտեսվել են: Այդ պատժամիջոցները խանգարում են մարդասիրական օգնություններ, ներառյալ դեղորայք ու բժշկական պարագաներ ապահովելուն»:
ՌԴ ԱԳ նախարարը նաև դատապարտել է ԱՄՆ-ի կողմից անկախ արտաքին քաղաքականություն վարող երկրների նկատմամբ ճնշումների մեծացումը և Առողջապահության համաշխարհային կազմակերպության դեմ հնչեցված զրպարտանքը:
