Հունաստանի բանակցությունները կրկին փակուղու մեջ են

Հունաստանն ու իր վարկատուներն այդպես էլ համաձայնության չգալով՝ երեքշաբթի օրը դադարեցրել են իրենց երկարատև բանակցությունները, որոնք երկրի համար կարող էին նոր հնարավորություններ ստեղծել ֆինանսական թվով երրորդ փաթեթի ստացման համար, գրում է Euronews –ը:

Կողմերը բանակցությունները կվերսկսեն միայն հաջորդ շաբաթ՝ ապրիլի 15-17-ն ընկած ժամանակահատվածում՝ Արժույթի միջազգային հիմնադրամի գարնանային նստաշրջանի ավարտից անմիջապես հետո։

«Համաձայնագրի կնքման վերաբերյալ բոլոր հարցերն արդեն լուծված են», - հայտարարել է Հունաստանի ֆինանսների նախարար Էվկլիդ Ցակալատոսը:

Հիշեցնենք, որ նախորդ հինգշաբթի օրը սկսվեց Հունաստանում բարեփոխումների պահանջի դեմ բողոքի երկրի Աշխատավորական ընդհանուր արհմիության 24-ժամյա գործադուլը, որն անդամալույծ դարձրեց ողջ Հունաստանը: Մեկօրյա այս գործադուլը սկսվեց այն պայմաններում, երբ արտասահմանցի վարկատուների ներկայացուցիչները գտնվում էին մայրաքաղաք Աթենքում:

Նշենք, որ Հունաստանում տնտեսական բարեփոխումների գործադրումը գործազրկության տարածման և ժողովրդի դժգոհության ու կառավարության հանդեպ նրանց անվստահության պատճառ է դարձել: Սա 2016 թվականին Հունաստանում արդեն թվով երկրորդ ընդհանուր գործադուլն էր: Առաջին ծավալուն գործադուլը տեղի էր ունեցել դեռևս փետրվարի 4-ին:

Բանն այն է, որ Հունաստանի կառավարությունն իր վարկատուների պահանջով մշակել է սոցիալական ապահովության բարեփոխումների նախագիծ և մտադիր է այն վավերացման համար խորհրդարանին ներկայացնել: Այս բարեփոխումների համաձայն կրճատվելու են թոշակները, բարձրացվելու է թոշակի անցնելու տարիքի շեմը, ինչպես նաև մեծ չափերով բարձրացվելու են գյուղատնտեսների ու ազատ աշխատանք ունեցողների համար սահմանված հարկերը: Հունաստանի վարչապետ Ալեքսիս Ցիպրասը խոստացել է այս տարվա ընթացքում միայն 1.8 միլիարդ եվրոյով կրճատել թոշակառության հետ կապված ծախսերը: Իսկ գործադուլավորներն իրենց հերթին խոստացել են շուտով նաև երրորդ լայնամասշտաբ գործադուլն իրականացնել երկրում:

armedia.am

13/4/2016