Էրդողանին բաց են թողել Ռուսաստանի վրա, Էրդողանի թելերն Ամերիկայում են

Ռուսաստանցի լրագրողների հարցին ի պատասխան, թե Ռուսաստանն ինչպես է դիրքավորվելու Էրդողանի կայսերական աճող հավակնությունների հանդեպ, որ ձեւավորվում է մի շարք ուղղություններով, ՌԴ արտգործնախարար Սերգեյ Լավրովն անդրադարձել է Միացյալ Նահանգներին:

Նա ասել է, թե ուշադրության է արժանի, որ թուրքական աշխուժության բոլոր ուղղություններում եւ ռեգիոններում ոչ պակաս կամ ավելի աշխույժ են երկրներ, որոնք տասնյակ հազարավոր մղոններ հեռու են այդ ռեգիոններից: Լավրովի խոսքով, այդ ուղղություններում ԱՄՆ-ն եւս շատ աշխույժ է:

Այդպիսով, նկատելի է, որ ՌԴ արտգործնախարարը Էրդողանի կայսերական աշխուժության եւ ագրեսիվության «հովանավոր» է դիտարկում Նահանգներին, այն համատեքստում, թե նրանք են մղում Էրդողանին:

Լավրովն այդպիսով փորձում է արդարացնել Թուրքիայի կայսերական ագրեսիվության հանդեպ Ռուսաստանի լոյալությունը: Միեւնույն ժամանակ, այստեղ իհարկե խնդիրը զուտ արդարացումը չէ, եւ կա ճշմարտության որոշակի հանգամանք, ինչը սակայն պայմանավորված է շատ ավելի խորքային իրողություններով:

Բանն այն է, որ «կայսերապաշտ Էրդողանին» ԱՄՆ-ն թերեւս սկսեց ձեւավորել ի հակակշիռ ոչ պակաս կայսերապաշտ Պուտինի, 2007 թվականի նրա մյունխենյան ելույթից հետո: Պուտինն այդ ելույթում ազդարարում էր Արեւմուտքի հետ կոշտ դիմակայության հեռանկարը:

«Կայսերապաշտ Էրդողանը» այն էր, ինչ «դեմ տրվեց» ՌԴ նախագահի կայսերական հավակնությանը: Բանն այն է, որ երկու այդ հավակնությունները չեն կարող գոյություն ունենալ միմյանց զուգահեռ: Դրանք հանդիպակաց են:

Միեւնույն ժամանակ, Էրդողանի թելերն անշուշտ Նահանգներում են, որտեղ կքաշեն դրանք շատ արագ՝ հարկ եղած դեպքում: Ամբողջ հարցն այն է, որ դրա համար հարկ է լինելու ԱՄՆ-Ռուսաստան ռազմավարական վերանայում: Մոսկվան փորձում է հնարավորինս ձգել այն, ակնկալելով, թե կարող է պայմանավորվել Էրդողանի հետ եւ շրջել նրան Արեւմուտքի դեմ: Այդ տրամաբանությամբ, ի դեպ, տեղի ունեցավ C 400-ի վաճառքի սկզբունքային գործարքը:

Սակայն, Էրդողանը դեռեւս չի «շրջվել», փոխարենն արդեն հատում է Ռուսաստանի համար առանցքային նշանակության կարմիր գծեր Կովկասում: Մոսկվան դեռ հուսով է, որ հնարավոր է պայմանավորվել ու շրջե՞լ Էրդողանին, թե՞ ավելի իրատեսական է ԱՄՆ հետ նրա թելերը քաշելու շուրջ պայմանավորվելը:

Lragir.am

Հայերեն ռադիոալիքին հետևեք սոցցանցերում

https://www.instagram.com/parstodayarmenian/
https://twitter.com/radio_armenian
https://www.reddit.com/user/armradio/
https://urmedium.com/c/armenianradio