ՄԱԿ-ը քննադատում է Եվրոպային՝ միգրանտների նկատմամբ բռնություն կիրառելու համար
ՄԱԿ-ի Միգրացիայի միջազգային կազմակերպությունը (ՄՄԿ) եվրոպական երկրներին կոչ է արել դադարեցնել միգրանտների նկատմամբ բռնությունները:
EUobserver կայքի փոխանցմամբ՝ ՄԱԿ-ի վերահսկողության ներքո աշխատող Միգրացիայի միջազգային կազմակերպության ներկայացուցիչ Իջինիո Ամբրոսին ընդգծել է.«Եվրոպան պետք է կանխի ապաստանյալների նկատմամբ բռնության կիրառումը»:
Նա հավելել է.«Քաղաքացիական անձանց նկատմամբ ուժի և բռնության կիրառումն արդարացում չունի: ԵՄ-ը պետք է շտապ քայլեր ձեռնարկի ապաստան հայցողների արտաքսումն արգելելու համար»:
ՄԱԿ-ի փախստականների գերագույն կոմիսարիատում Միջազգային պաշտպանության պատասխանատու Ջիլիան Թրիգսը, մտահոգություն հայտնելով Եվրոպայի սահմաններ մուտք գործող միգրանտների և ապաստան հայցողների ձերբակալության կապակցությամբ, ասել է.«Միջազգային պաշտպանության ոլորտում անտեսելով միգրանտների կարիքները և նրանց բռնի կերպով սահմաններ վերադարձնելն անօրինական քայլեր են»:
