Հունաստանի քաղաքացիները հրկիզել են ՆԱՏՕ-ի և ԱՄՆ-ի դրոշները

Հունաստանի քաղաքացիները բողոքել են այդ երկրում ԱՄՆ-ի ռազմական ներկայության դեմ՝ հրկիզելով ԱՄՆ-ի և ՆԱՏՕ-ի դրոշները։

«Անատոլու» լրատվական գործակալության փոխանցմամբ՝ Հունաստանի հյուսիսային Ալեքսանդրոպոլիս նավահանգստային քաղաքի բնակիչները շաբաթ օրը ցույց են կազմակերպել՝ ընդդեմ այդ երկրում ԱՄՆ-ի ռազմական ներկայության ընդլայնման։

Հույն-ամերիկյան ռազմական պայմանագրին դեմ կոմիտեի  գլխավոր քարտուղարը դատապարտել է Ալեքսանդրոպոլիս նավահանգստի օգտագործումը Միացյալ Նահանգների զինվորականների կողմից։

Նա նշել է, որ ոչ ոք պարզապես չի կարող լուռ հետևել, թե ինչպես են  Արևելյան Մակեդոնիայի քաղաքն ու շրջանը վերածվում իմպերիալիստական ​​հենակետի։

Ավելի վաղ այս նավահանգստային քաղաքի թատրոնում տեղի էր ունեցել հերթական բողոքի ակցիան ընդդեմ ԱՄՆ-Հունաստան ռազմական համաձայնագրի և երկրում ԱՄՆ ռազմական ներկայության ընդլայնման։

Վերջերս Միացյալ Նահանգները և Հունաստանը ստորագրեցին պաշտպանական համաձայնագիր, որն ամերիկյան զորքերին թույլ կտա տեղակայվել  Հունաստանի տարբեր շրջաններում: