Եվրոպայից ճանապարհը թեքած Էրդողանը ԵՄ անդամակցությունը «ռազմավարական նպատակ է» հայտարարել
Եվրոպական ուղղությունից ճանապարհը շեղած Թուրքիայի նախագահ Թայիփ Էրդողանն այժմ էլ հայտարարել է, որ Անկարայի «ռազմավարական նպատակը» Եվրամիությանը լիիրավ անդամակցությունն է:
Ինչպես հաղորդում է «Արմենպրես»-ը` վկայակոչելով «Անատոլու» լրատվական գործակալությունը, այս մասին Էրդողանը հայտարարել է Եվրոպայի օրվա կապակցությամբ հրապարակած ուղերձում:
Էրդողանը հույս է հայտնել, որ Թուրքիայի քաղաքացիների համար ԵՄ առանց վիզային ռեժիմի հաստատումը «կարագացնի ԵՄ-ին Թուրքիայի միանալու գործընթացը»:
«Հուսով եմ, որ վիզայի չեղարկումը դրականորեն կազդի տրված խոստումների կատարման համար եւ կարագացնի միացման գործընթացը», -ասել է նա:
Թուրքիայի` ԵՄ-ին անդամակցելու թեկնածության կարգավիճակը հաշվառվել է 1999 թվականին:
Հետաքրքիր է, որ երկու օր առաջ Էրդողանը Թուրքիայի ԵՄ անդամակցության հետ կապված տառացիորեն հայտարարել էր. «Մենք գնում ենք մեր ճանապարհով, դուք էլ գնացեք ձեր ճանապարհով»:
Գերմանական Bild թերթը, հղում կատարելով ԵՄ երկրի արտգործնախարարներից մեկին, այսօր հայտնել է, որ Թուրքիան կարող է զրկվել ԵՄ միգրացիոն համաձայնագրով նախատեսված միլիարդներից:
Միգրացիոն խնդիրը լուծելու համար Եվրամիության կողմից Թուրքիային խոստացված 6 միլիարդ եվրոն կարող է բաժին ընկնել Հունաստանին, եթե Թուրքիայի նախագահ Ռեջեփ Թայիփ Էրդողանը խզի գործարքը, գրել է թերթը:
Թերթի տվյալներով` ԵՄ որոշ երկրների կառավարությունների ղեկավարներ ներկա պահին քննարկում են փախստականների գծով Թուրքիայի հետ համաձայնագրի այլընտրանքը, քանի որ նրանք ավելի շատ հիմքեր ունեն համարելու, որ թուրքական կողմը կարող է խզել գործարքը:
Բրյուսելն ու Անկարան մարտի 18-ին համաձայնագիր են ստորագրել` պայմանավորվելով թուրքական քաղաքացիների համար առանց վիզային ռեժիմի, 3 միլիարդ եվրոյի եւ Թուրքիայից ԵՄ սիրիական փախստականների ընդունման դիմաց հետ վերադարձնել Թուրքիայի տարածքով Հունաստան ժամանած բոլոր անլեգալ միգրանտներին:
