Ղազախստանի տարածքում իրավիճակը կայունանում է և գտնվում է իշխանության վերահսկողության տակ

ՀԱՊԿ-ի խաղաղապահ ուժերն ավարտել են տեղակայումը Ղազախստանում և ձեռնամուխ են եղել խնդիրների կատարմանը:

Ղազախստանի Հանրապետության տարածքում իրավիճակը կայունանում է և գտնվում է իշխանության վերահսկողության տակ։ Բացի այդ, ՀԱՊԿ-ի խաղաղապահ ուժերն ավարտել են տեղակայումը Ղազախստանում և ձեռնամուխ են եղել խնդիրների կատարմանը:

Այս մասին Ղազախստանի Հանրապետության պաշտպանության նախարարի տեղակալ, գեներալ-լեյտենանտ Սուլթան Գամալետդինովի հետ համատեղ ճեպազրույցի ժամանակ հայտարարել է ՀԱՊԿ խաղաղապահների հրամանատար Անդրեյ Սերդյուկովը։

«Ներկայում խաղաղապահ ուժերի ստորաբաժանումները Ալմաթի քաղաքում և դրա հարակից շրջաններում կատարում են կարևոր ռազմական, պետական և սոցիալական նշանակության օբյեկտների պահպանության խնդիրները»,- ասել է Սերդյուկովը:

Նա նշել է, որ Հավաքական խաղաղապահ ուժերի ստորաբաժանումների կողմից խնդիրների կատարումը կշարունակվի մինչև երկրում իրադրության լիակատար կայունացումը:

Սերդյուկովը նաև հայտնել է, որ Ռուսաստանի օդատիեզերական ուժերի ռազմատրանսպորտային ավիացիայի ինքնաթիռներով կազմակերպվել է Ալմաթիում արձակուրդում գտնվող Ռուսաստանի քաղաքացիների կամ հարազատների տեղափոխումը, որոնք ցանկություն են հայտնել մեկնել ՌԴ:

Իր հերթին Ղազախստանի պաշտպանության փոխնախարար, գեներալ-լեյտենանտ Գամալետդինովը նշել է, որ իրավիճակը Ղազախստանի տարածքում կայունանում է և գտնվում է իշխանության վերահսկողության տակ:

Նա շնորհակալություն է հայտնել ՀԱՊԿ Հավաքական խաղաղապահ ուժերի հրամանատարությանը և անձնակազմին՝ ղազախ ժողովրդին ցուցաբերած եղբայրական օգնության համար:

«Խաղաղապահների կողմից առավել կարևոր օբյեկտները պահպանության տակ վերցնելը մեզ թույլ տվեց ազատել իրավապահ մարմինների և զինված ուժերի զգալի մասը, որոնք պայքարում էին ահաբեկիչների դեմ»,- նշել է Գամալետդինովը:

Ներկայում Ղազախստանի տարածքում շարունակվում է հակաահաբեկչական գործողության անցկացումը։ Այն կշարունակվի մինչև ահաբեկիչների լիակատար ոչնչացումը և երկրում սահմանադրական կարգի վերականգնումը:

armeniasputnik.am