ԱՄՆ-ն 90 տոննա մահացու զենք է ուղարկել Ուկրաինա
ԱՄՆ-ից Ուկրաինային հատկացվող լրացուցիչ ռազմական օգնության առաջին խմբաքանակը հասել է Կիև: Այս մասին հայտնում է «Կոմերսանտ»-ը՝ հղում անելով Կիևում ամերիկյան դեսպանությանը:
«Ռազմական օգնությունը ներառում է մոտ 90 տոննա մահացու զենք, այդ թվում՝ Ուկրաինայի՝ ռազմաճակատում գտնվող պաշտպանների համար նախատեսված զինամթերք: Այս օգնությունը ցույց է տալիս ԱՄՆ-ի հավատարմությունն Ուկրաինայի պաշտպանունակության ամրապնդմանը՝ Ռուսաստանի կողմից աճող ագրեսիայի ֆոնին»,- ասվում է դեսպանատան հաղորդագրության մեջ:
Ուկրաինան ավելի վաղ հայտնել էր, որ ԱՄՆ-ն լրացուցիչ օգնություն է հատկացրել երկրին 200 մլն դոլարի չափով՝ պաշտպանական կարիքների համար: CNN-ի տվյալներով՝ Վաշինգտոնը մտադիր է զենք, զինամթերք, բժշկական սարքավորումներ և ռադիոլոկացիոն դիտարկման միջոցներ փոխանցել: 2021 թվականին ԱՄՆ-ի կողմից Ուկրաինային հատկացված ռազմական օգնության ընդհանուր ծավալը հասել է ռեկորդային 650 մլն դոլարի:
tert.am
