Տաջիկստանի ու Ղրղըզստանի սահմանին փոխհրաձգություն է սկսվել
Տաջիկստանի ու Ղրղըզստանի սահմանին փոխհրաձգություն է սկսվել երկու երկրների սահմանապահների միջեւ, հայտնում է «ՌԻԱ Նովոստին»՝ հղում անելով Ղրղըզստանի սահմանային վարչության մամուլի ծառայությանը։
Բիշքեկը հավելել է, որ տաջիկական կողմը ականանետեր եւ նռնականետեր է օգտագործում։
Ավելի վաղ հաղորդվել էր, որ սահմանապահներին ծառայության ուժեղացված տարբերակի են տեղափոխել՝ Տաջիկստանի հետ սահմանին լարվածության ֆոնին այն բանի պատճառով, որ Դուշանբեն միակողմանի փակել է Բատկենի շրջանի Տորթ-Կոչո տեղանքում ճանապարհի մի հատվածը, որը միացնում է Ղրղըզստանի Բատկեն եւ Իսֆան քաղաքները։ Իրավիճակը դեէսկալացնելու համար դեպքի վայր են մեկնել երկու երկրների պաշտոնատար անձինք։
«Սակայն ժամը 19:35-ի սահմաններում իրավիճակը սրվել է Ղրղըզստանի Հանրապետության ազգային անվտանգության պետական կոմիտեի սահմանային ստորաբաժանումների վրա Բատկենի շրջանի Չիր-Դոբո տեղանքում տաջիկական կողմից զենքի կիրառման եւ կրակոցների պատճառով: Ղրղըզստանի եւ Տաջիկստանի սահմանապահ զորքերի ստորաբաժանումների միջեւ հիմնական փոխհրաձգությունը տեղի է ունենում Տորտ-Կոչոյի եւ Չիր-Դոբոյի տարածքներում»,- հայտարարել են Բիշքեկում։
Ղրղըզստանի եւ Տաջիկստանի սահմանը պարբերաբար դառնում է տեղի բնակիչների եւ երկու երկրների սահմանապահների միջեւ հակամարտությունների գոտի, որոնք առաջանում են չսահմանազատված հատվածների պատճառով, որտեղ անհնար է որոշել, թե ինչպես է անցնում պետությունների միջեւ սահմանը։
Վերջին անգամ նմանատիպ իրավիճակ եղել է դեկտեմբերին՝ նույն շրջանի Կոչո-Բոյու տեղանքում։ Այնուհետեւ Ղրղըզստանի քաղաքացիները վիճելի հատվածում շինարարական աշխատանքներ են կատարել, նրանց փորձել են խանգարել տաջիկ զինվորականները։ Սկսված վիճաբանության ժամանակ սահմանապահներից մեկը չորս կրակոց է արձակել օդ։
news.am