Իրաքի գործերի ժամանակավոր հավատարմատարը կանչվել է Թուրքիայի ԱԳՆ
Թուրքիայի արտաքին գործերի նախարարությունը Քրդական բանվորական կուսակցության (PKK) դեմ թուրքական զինուժերի գործողությունների վերաբերյալ պաշտոնական Բաղդադի հայտարարությունների առնչությամբ ԱԳՆ է կանչել Իրաքի գործերի ժամանակավոր հավատարմատարին:
Այս մասին հայտնել է Թուրքիայի ԱԳՆ պաշտոնական ներկայացուցիչ Թանժու Բիլգիչը:
ԱԳՆ-ում Իրաքի գործերի ժամանակավոր հավատարմատարին հայտնել են թուրքական կողմի դժգոհությունը «չհիմնավորված մեղադրանքների առնչությամբ»: Արտաքին քաղաքական գերատեսչությունից հայտնել են նաև, որ Անկարան «շարունակելու է ձեռնարկել անհրաժեշտ քայլեր ինքնապաշտպանության իրավունքի հիման վրա այնքան ժամանակ, քանի դեռ իրաքյան իշխանությունները չեն ձեռնարկի հստակ ու արդյունավետ քայլեր»՝ ընդդեմ Քրդական բանվորական կուսակցության անդամների:
Թուրքիայի զինուժը նոր ռազմական գործողություն է սկսել Իրաքի հյուսիսում՝ ընդդեմ PKK-ի: Իրաքի իշխանությունները դատապարտել էին թուրքական զինված ուժերի գործողությունները՝ հայտարարելով, որ դրանք խախտում են Իրաքի ինքնիշխանությունը:
yerevanlur.am
