Չինաստանը զորավարժություններ է սկսել Թայվանի մոտ

Մեկնարկել են Թայվան կղզու մոտ Չինաստանի մեծ զորավարժությունները։

Զորավարժությունները սկսել են ԱՄՆ Կոնգրեսի Ներկայացուցիչների պալատի նախագահ Նենսի Փելոսիի՝ Թայվան կատարած  19-ժամյա ուղևորությունից մեկ օր անց։

Պեկինը, որը Թայվանը համարում է Չինաստանի անբաժանելի մասը, միշտ դատապարտել է արևմտյան պաշտոնյաների միջամտությունն ու այցն այս կղզի և ասում է, որ այդ գործողությունները խախտում են «մեկ Չինաստան» սկզբունքը։

Չինաստանի պետական ​​CCTV հեռուստատեսությունը հայտարարել է. «Այսօրվանից մինչև օգոստոսի 7-ը Չինաստանի ազատագրական բանակը կարևոր ռազմական զորավարժություններ է անցկացնում Թայվան կղզու մերձակա վեց շրջաններում, և այդ ընթացքում ոչ մի նավ կամ ինքնաթիռ չպետք է մտնի համապատասխան ծովային և օդային տարածքներ»։

Թայվանի պաշտպանության նախարարությունը հայտարարել է. «Զինված ուժերը կշարունակեն աշխատել սովորականի ռեժիմով և կվերահսկեն կղզու շրջակա տարածքը»։