«Եվրախորհրդարանն աշխարհում ամենակոռումպացված կազմակերպություններից է». Հունգարիայի ԱԳՆ
Եվրոպական խորհրդարանն աշխարհում ամենակոռումպացված կազմակերպություններից մեկն է։ Այս մասին հայտարարել է Հունգարիայի արտգործնախարար, արտաքին տնտեսական կապերի նախարար Պետեր Սիյարտոն։
«Ես կարող եմ ԵԽ շատ քիչ հայտարարություններ, բանաձևեր հիշել, որոնք կօգնեին Եվրոպային։ Եվրախորհրդարանի հանդեպ հավատը գրեթե զրոյի է հավասարվել, վերջին շրջանում կոռուպցիոն իրադարձություններն էլ հստակ ցույց տվեցին, որ խոսքն աշխարհի ամենակոռումպացված կազմակերպություններից մեկի մասին է։ ԵԽ բանաձևերը Եվրոպային հիմնականում վնաս են հասցրել»,– Kossuth ռադիոյին տված հարցազրույցում ասել է Սիյարտոն։
Հունգարիայի ԱԳ նախարարը կրկնել է Բուդապեշտի պաշտոնական դիրքորոշումը, համաձայն որի իրենք դեմ են էներգետիկայի ոլորտում հակառուսական պատժամիջոցներ կիրառելուն, Կիևին զենք չեն ուղարկում և կոչ են անում դադարեցնել կրակն ու խաղաղ բանակցություններ սկսել։
Անցյալ տարվա դեկտեմբերի սկզբին Բելգիայի ոստիկանությունն ու դատախազությունը մի քանի ձերբակալություններ և խուզարկություններ էր իրականացրել Բրյուսելում, որտեղ գտնվում է Եվրախորհրդարանը։ Իրավապահները գործողություններն իրականացրել էին Կատարում ֆուտբոլի աշխարհի առաջնության անցկացման հետ կապված կոռուպցիայի կասկածների հետաքննության շրջանակում։
Իտալացի հայտնի քաղաքական գործիչն ադրբեջանցներից կաշառք ստանալու համար 4 տարով կազատազրկվի
Ձերբակալվել էին Եվրախորհրդարանի փոխնախագահ, հույն քաղաքական գործիչ Եվա Քայլին և նրա ընկերը, խուզարկություն էր անցկացվել քաղաքական գործչի բնակության վայրում:
Այս սկանդալային իրադարձությունից հետո ԵԽ պատգամավորները Բրյուսելում կայացած լիագումար նստաշրջանում պատգամավորական անձեռնմխելիությունից զրկել են երկու խորհրդարանականի ՝ բելգիացի Մարկ Տարաբելլային և իտալացի Անդրեա Կոցոլինոյին։ Նրանք էլ են անցնում կոռուպցիայի աղմկահարույց գործով:
armeniasputnik.am
