Վրաստանն ու Ադրբեջանն աշխատում են Միջին միջանցքի զարգացման ուղղությամբ. Ղարիբաշվիլի
Վրաստանն ու Ադրբեջանը համակարգված աշխատում են Միջին միջանցքի զարգացման ուղղությամբ։ Այս հայտարարությունն արել է Վրաստանի վարչապետ Իրակլի Ղարիբաշվիլին Ադրբեջանի նախագահ Իլհամ Ալիևի հետ համատեղ ճեպազրույցի ժամանակ:
Վրաստանի վարչապետը վստահություն է հայտնել, որ մոտ ապագայումայդ երթուղու զարգացմանը խանգարող բոլոր խոչընդոտները կվերացվեն:
«Պետք է համատեղ զարգացնել ենթակառուցվածքները՝ մեր նավահանգիստներն ու երկաթուղիները։ Մենք հիմա աշխատում ենք Վրաստանում նոր նավահանգստի կառուցման ուղղությամբ (խոսքը Անակլիա նավահանգստի կառուցման մասին է. խմբ․)»,-ասել է Վրաստանի կառավարության ղեկավարը։
Նրա խոսքով՝ Թբիլիսին մեկ տարվա ընթացքում նախատեսում է ավարտել երկաթուղու ընդլայնման նախագիծը։ Ակտիվ աշխատանքներ են տարվում նաև Բաքու-Թբիլիսի-Կարս երկաթգծի ուղղությամբ։ Ղարիբաշվիլին կարծում է, որ դա նաև թույլ կտա ավելացնել բեռնափոխադրումների հոսքը Միջին միջանցքով։
Ավելի վաղ Թուրքիայի արտաքին գործերի նախարար Մևլութ Չավուշօղլուն հայտարարել էր Թուրքիայի, Ադրբեջանի, Վրաստանի և Իրանի միջև եռակողմ և քառակողմ համագործակցության ձևաչափերի մասին: Թուրքիայի արտգործնախարարը ենթադրել էր, որ ապագայում Հայաստանը կարող է միանալ իրենց, այդ թվում՝ Միջին միջանցքի շրջանակներում։
Տրանսկասպիական միջազգային տրանսպորտային միջանցքը (ՏՄՏՄ) անցնում է Չինաստանով, Ղազախստանով, Կասպից ծովի ավազանով, Ադրբեջանով, Վրաստանով դեպի Թուրքիա և Եվրոպայի երկրներ։ Այդ պատճառով դեպի Հայաստան ճյուղը կարող է միայն զուգահեռ երթուղի լինել։
ՏՄՏՄ-ն դեռ ամբողջությամբ չի գործարկվել, բայց դրանով արդեն թեստային բեռներ են անցել (երեք կոնտեյներային գնացք): Լոգիստիկ շղթայի մասնակիցները ճշգրտում են ճանապարհին գտնվելու ժամանակը, մատակարարման ծավալներն ու հնարավորությունները:
armeniasputnik.am
