ԵԱՏՄ-ն պետք է դառնա ինքնաբավ մակրոտարածաշրջան․ ՌԴ վարչապետը՝ Ծաղկաձորում
Եվրասիական տնտեսական միությունում անհրաժեշտ է ամուր հիմք դնել ապագա համատեղ գործողությունների համար։ Ծաղկաձորում անցկացվող Եվրասիական միջկառավարական խորհրդի նիստին այս մասին ասաց Ռուսաստանի Դաշնության վարչապետ Միխայիլ Միշուստինը։
«Արդեն հիմա անհրաժեշտ է ամուր հիմք դնել ապագա համատեղ գործողությունների համար։ Եվրասիական տնտեսական միությունը պետք է դառնա ինքնաբավ մակրոտարածաշրջան։ Եվ միևնույն ժամանակ՝ գրավիչ և բաց այլ գործընկերների համար», - ասաց Միշուստինը։
Նրա խոսքով ՝ առաջնահերթ է ապրանքների և ծառայությունների, ֆինանսների և ներդրումների, աշխատուժի ընդհանուր շուկաների ձևավորման շարունակությունը՝ կյանքի որակի բարելավման, քաղաքացիների բարեկեցության և ձեռնարկատիրական ակտիվության բարձրացման համար:
«Անհրաժեշտ է ստեղծել առանցքային ապրանքներով և ռեսուրսներով ապահովված միասնական տարածք։ Առաջին հերթին խոսքը պարենային և էներգետիկ անվտանգության մասին է։ Այս թեման գնալով ավելի մեծ նշանակություն է ստանում համաշխարհային շուկա հացահատիկի մատակարարման հետ կապված դժվարությունների ֆոնին, որոնք մենք տեսնում ենք»,- ասաց նա։
Միշուստինը նշեց, որ ԵԱՏՄ-ն աշխարհում երրորդ տեղն է զբաղեցնում ցորենի, կարտոֆիլի, անասնապահական արտադրանքի արտադրությամբ:
«Հնգյակի» երկրները կշարունակեն հանդես գալ որպես ներքին և արտաքին շուկաներ գյուղատնտեսական ապրանքների հուսալի մատակարարներ։ Մենք նաև լիովին ապահովում ենք մեզ գազով, նավթով, նավթամթերքով և էլեկտրաէներգիայով»,- հավելեց նա։
