Անկարայում քննարկվել է հայ-ադրբեջանական հարաբերությունների կարգավորման գործընթացը. ՌԴ ԱԳՆ
Ռուսաստանի փոխարտգործնախարար Միխայիլ Գալուզինն Անկարայում թուրք գործընկերոջ՝ Բուրաք Աքչափարի հետ ունեցած խորհրդակցությունների ընթացքում քննարկել է նաև Անդրկովկասում տիրող իրավիճակը՝ մասնավորապես հայ-ադրբեջանական հարաբերությունների կարգավորման գործընթացը։
Այս մասին հայտնում է ՌԴ ԱԳՆ-ի պաշտոնական կայքը։
Կողմերը ներկայացրել են Հարավային Կովկասում իրադրության վերաբերյալ իրենց տեսակետները։
«Ընդգծվել է հայ-ադրբեջանական հարաբերությունների կարգավորման գործընթացի կարևորությունը՝ նպաստելով դրան առաջին հերթին տարածաշրջանային ձևաչափերի շրջանակներում», - նշվում է հրապարակման մեջ։
Անդրկովկասյան թեմայից բացի, քննարկվել է նաև ուկրաինական ճգնաժամի թեման՝ ներառյալ դրա քաղաքական և դիվանագիտական կարգավորման հեռանկարները։
Գնահատականներ են տրվել Կենտրոնական Ասիայի երկրների հետ փոխգործակցության վերաբերյալ, ինչպես նաև՝ քննարկվել են ռուս-թուրքական օրակարգի արդիական թեմաները։
armenpress.am
